الماتىدا جاسى 65 تەن اسقاندار مەن بالالاردىڭ دەنساۋلىعى تەگىن تەكسەرىلەدى

None
None
الماتى. قازاقپارات - الماتى اكىمى باقىتجان ساعىنتايەۆتىڭ تاپسىرماسىمەن COVID-19 ەكىنشى تولقىنىنا دايىندىق اياسىندا قالادا بالالار مەن قارت ادامدارعا تەگىن پروفيلاكتيكالىق تەكسەرۋ جۇرگىزىلۋدە.

بۇل تۋرالى №19-قالالىق ەمحانانىڭ باس دارىگەرى كامشات ايتقازينا ونلاين بريفينگ بارىسىندا ايتتى، دەپ حابارلايدى قازاقپارات ءتىلشىسى.

كامشات ايتقازينانىڭ ايتۋىنشا، قالادا حالىقتىڭ الەۋمەتتىك جاعىنان ەڭ ءالسىز توپتارىن تەكسەرۋمەن قامتۋ تۋرالى شەشىمى قابىلدانعان. ءبىرىنشى كەزەكتە، بۇل كوپتەگەن سوزىلمالى اۋرۋى بار جاسى ۇلكەن ادامدار توبى (65 جانە ودان جوعارى جاستاعى) جانە 16 جاسقا دەيىنگى بالالار قامتىلادى. تۇركسىب اۋدانىندا 7 مەديتسينالىق ۇيىم جۇمىلدىرىلعان، وندا 242081 ادامعا قىزمەت كورسەتىلەدى، ونىڭ ىشىندە 16 جاسقا دەيىنگى 66460 بالا بولسا، 65 جاستان اسقان 20918 ادام بار. ديسپانسەر ەسەبىندەگى توپتا 15543 ەرەسەك جانە 12712 بالا بار.

«مەديتسينالىق ۇيىمدارمەن ءبىرىنشى كەزەكتە نىسانالى توپتار قۇرىلىپ، مۋلتيديستسيپلينارلى كوماندا قۇرامى بەكىتىلىپ، ارنايى ۇيگە شاقىرتۋ بويىنشا بارۋ كەستەسى جاسالدى»، - دەدى باس دارىگەر.

وسىلايشا، 12760 بالانى جانە 65 جاستان اسقان 11700 ادامدى تەكسەرۋ جوسپارلانعان. ونىڭ ىشىندە كوپبالالى وتباسىلاردان - 608 بالا. جالعىز باستى انا تاربيەسىندەگى - 104 بالا. مۇمكىندىگى شەكتەۋلى - 415 بالا بار.

«65 جاستان اسقان ادامداردى تەكسەرۋ ءۇشىن جالپى تاجىريبەلىك دارىگەر مەدبيكەسىمەن، نيەۆروپاتولوگ، كارديولوگ، وتولارينگولوگ ماماندار، بالالار ءۇشىن پەدياتر دارىگەر، نيەۆروپاتولوگ، وكۋليست، وتولارينگولوگ، بالالار حيرۋرگى بار بريگادالار قۇرىلدى. پاتولوگيا انىقتالعان جاعدايدا، پاتسيەنتتەر ەسەپكە الىنىپ، دەنساۋلىعىندا انىقتالعان كەمشىلىككە بايلانىستى، ەم تاعايىندالادى»، - دەدى كامشات ايتقازينا.

ناۋرىز ايىنان تامىزعا دەيىن كارانتين شەكتەۋى ەنگىزىلگەنىن ەسكەرە وتىرىپ، كوپتەگەن ناۋقاستار مەرزىمدى ديسپانسەرلىك تەكسەرۋدەن ۋاقىتىلى وتە المادى، سول سەبەپتى ءبىر جاعىنان تولىقتاي تەكسەرۋ جۇرگىزۋ، ياعني، فليۋروگرافيا، ءىش قۋىسى ورگاندارىن جانە بۇيرەكتى ۋلترادىبىستىق تەكسەرۋ، جالپى قان تالداۋى، جالپى ءزار تالداۋى، قاننىڭ بيوحيميالىق تالداۋى، ارتەريا قىسىمى مەن كوز قىسىمىن ولشەۋ جۇرگىزۋ جوسپارلانعان.

«اۋرۋ بەلگىسى بويىنشا قارت ادامدارعا كۇندىزگى ستاتسيوناردا، ءۇي ستاتسيونارىندا ەم تاعايىندالادى، سونىمەن بىرگە، تەگىن ءدارى جەتكىزىلەدى»، - دەپ اتاپ ءوتتى ك. ايتقازينا.

نىسانالى توپ پەن قاۋىپتى توپتاعىلار COVID-19 جۇقتىرۋعا الدەقايدا بەيىم ەكەنىن ەسكەرە وتىرىپ، مۋلتيديستسيپلينارلىق توپتار اقپاراتتىق جۇمىسقا ەرەكشە نازار اۋدارۋدا. بۇدان باسقا، حالىقتى كوروناۆيرۋس ينفەكسياسىنىڭ جەكە جانە قوعامدىق الدىن الۋ شارالارى تۋرالى اقپاراتتاندىرۋ ەمحانالاردىڭ سايتىندا، الەۋمەتتىك جەلىدە جانە قوعامدىق ورىندا اقپارات، بەينەروليك ورنالاستىرۋ ارقىلى جۇرگىزىلەدى.

سوڭعى جاڭالىقتار