قازاقستاندا سمارتفون كومەگىمەن ساتىپ الۋشىلاردىڭ ۇلەسى 65 پايىزعا جاقىندادى
بۇل تۋرالى بۇگىن ۇكىمەت وتىرىسىندا ق ر ساۋدا جانە ينتەگراتسيا ءمينيسترى باقىت سۇلتانوۆ ايتتى، دەپ حابارلايدى قازاقپارات ءتىلشىسى.
«ەلەكتروندىق كوممەرتسيادا ماركەتپلەيس دەگەن قۇرالدارعا سۇرانىس ارتىپ كەلەدى. بۇعان مىسال رەتىندە Alibaba جانە Amazon ەلەكتروندى پلاتفورمالارى بولىپ سانالادى. ولار ءوز ەلدەرىندە ونلاين نارىقتارىنىڭ جارتىسىنا يە. ەلەكتروندىق ساۋدانىڭ تاعى دا ءبىر ترەندى - بۇل كوبىنەسە سمارتفوندار ارقىلى ساتىپ الۋ. سمارتفونداردىڭ كومەگىمەن ساتىپ الۋشىلاردىڭ ۇلەسى بۇكىل الەمدە 54 پايىزدى قۇرايدى. قازاقستاندا بۇل كورسەتكىش 65 پايىزعا جاقىندادى»، - دەدى مينيستر.
ونىڭ دەرەگىنشە، ەلىمىزدە ەلەكتروندىق ساۋدا نارىعىنىڭ كولەمى 2019-جىلى 1,8 ەسەگە ءوسىپ، 700 ميلليارد تەڭگەدەن استى. ەلەكتروندىق ساۋدانىڭ بولشەك ساۋداداعى ۇلەسى 1 پايىزدىق پۋنكتىن قوسىپ، 3,7 پايىزدى قۇرادى.
«بۇل ايتارلىقتاي ءوسۋ الەۋەتىن كورسەتەدى. وسى رەتتە، ىشكى نارىق قارقىندى دامۋدا. قازاقستاندىق ينتەرنەت-دۇكەندەردەن ساتىپ الۋ كولەمى 422 ميلليارد، حالىقارالىق ينتەرنەت-الاڭداردا 280 ميلليارد تەڭگەنى قۇرادى. ساتىپ الۋلار سانى 40,5 ميلليونعا دەيىن ءوستى. بۇل رەتتە ىشكى نارىقتىڭ نەگىزگى ءوسىمى 2,5 ەسەگە اسىپ، 22 ميلليون دانا بولدى. 2019-جىلى بەلسەندى ساتىپ الۋشىلاردىڭ سانى 72 پايىزعا ارتىپ، 3,2 ميلليون ادامدى قۇرادى»، - دەدى ول.
باقىت سۇلتانوۆتىڭ ايتۋىنشا، قازاقستاندا 2 مىڭنان استام ينتەرنەت-دۇكەن بار. الايدا، سالىق جەڭىلدىكتەرىن پايدالانۋ ءۇشىن 579 ينتەرنەت-دۇكەن عانا تىركەلگەن.
«سوندىقتان نارىقتىڭ رەتتەۋ راسىمدەرىن قاتاڭداتپاي، وسى سالانىڭ زاڭدى قىزمەتىن ىنتالاندىرۋ بويىنشا شارالار قابىلداۋ ماڭىزدى. تاۋارلار مەن قىزمەتتەردىڭ اينالىمىنىڭ اشىق بولا ءتۇسۋىنىڭ دالەلى رەتىندە ايتاتىن جايت، 2019-جىلعى قولما-قول اقشاسىز تولەمدەر كولەمى 2,3 ەسەگە ارتىپ، شامامەن 14,4 تريلليون تەڭگەنى قۇرادى. بۇل ءوسىم POS- تەرمينالداردىڭ ساۋدا ينفراقۇرىلىمىنىڭ دامۋىنا، قازاقستان نارىعىنا Apple Pay جانە Samsung Pay سياقتى جۇيەلەردىڭ ەنۋىنە، بانكتەردىڭ كليەنتتەرىنە بونۋستار مەن كەشبەك ستيمۋلدارى ارقىلى ىنتالاندىرۋىنا، سونداي-اق قوعامدىق كولىكتىڭ بارلىق تۇرلەرىندە قولما-قول اقشاسىز تولەمدەردى بەلسەندى قولدانۋعا بايلانىستى. 2019-جىلى ەلەكتروندىق ساۋدادا 36,8 مىڭ جاڭا جۇمىس ورنى اشىلدى»، - دەدى مينيستر.