وتكەن جىلى 65 مىڭ قازاقستاندىققا شەتەلگە شىعۋعا تىيىم سالىندى

استانا. قازاقپارات - 2017 -جىلدىڭ قورىتىندىسى بويىنشا، سالىق قارىزىن تولەمەگەن  65795 قازاقستاندىقتىڭ ەل اۋماعىنان شىعۋىنا تىيىم سالىندى. بۇل تۋرالى ق ر مەملەكەتتىك كىرىستەر كوميتەتى بەرەشەكتەرمەن جۇمىس باسقارماسىنىڭ باسشىسى اينۇر قۇلشىقوۆا ءمالىم ەتتى،

دەپ حابارلايدى قازاقپارات ءتىلشىسى.

باسقارما باسشىسى سالىقتىق بەرەشەكتەردى ءوندىرىپ الۋ ءتارتىبىن ءتۇسىندىردى.

«الدىمەن سالىق تولەۋشىگە قارىزدى وتەۋ تۋرالى ەسكەرتۋ جىبەرىلەدى، بۇل ءۇشىن وعان 10 جۇمىس كۇنى بەرىلەدى. ەگەر بورىشكەر ءوز مىندەتتەمەلەرىن ورىنداماسا، ونىڭ بانكتەگى ەسەپشوتتارىندا وپەراتسيالار بۇعاتتالادى، وندا تۇسكەن قاراجاتتار وزگە ماقساتتارعا قولدانىلمايدى. ۋاكىلەتتى ورگانداردا بورىشكەردىڭ مۇلكىنە تىيىم سالىنادى. بۇل شارالاردان كەيىن دە سالىق قارىزى وتەلمەسە، كەلەسى كەزەڭگە كوشەمىز. بانك ەسەپشوتىنداعى قاراجات ءوندىرىلىپ، بۇعان دەيىن شەكتەۋ سالىنعان مۇلكى ساتىلىمعا شىعادى»، - دەدى اينۇر قۇلشىقوۆا استانادا وتكەن باسپا ءسوز ءماسليحاتىندا.

ونىڭ ايتۋىنشا، بيىلدان باستاپ، سالىق قارىزىن ءوندىرىپ الۋ ءۇشىن سوت بۇيرىعى قاجەت بولمايدى. ونىڭ ورنىنا سالىق بۇيرىعى شىعارىلىپ، جەكە سوت ورىنداۋشىلارىنا تىكەلەي جىبەرىلەدى جانە بورىشكەرگە تاعى دا ەسكەرتۋ جاسالادى.

«سالىق بۇيرىعى ورىندالماعان جاعدايدا، سوت ورىنداۋشى وزدىگىنەن شارا قابىلداۋعا قۇقىلى، ياعني جەكە تۇلعالاردىڭ قازاقستان اۋماعىنان شىعۋىنا شەكتەۋ قويادى. بۇل شارا قارىزى 20 ا ە ك- تەن، ياعني 48 مىڭ 100 تەڭگەدەن اسىپ كەتكەن جەكە تۇلعالارعا قولدانىلادى. 2017 -جىلدىڭ قورىتىندىسى بويىنشا، 65 مىڭ 795 قازاقستاندىقتىڭ ەل اۋماعىنان شىعۋىنا تىيىم سالىندى»، - دەپ ءتۇسىندىردى ا. قۇلشىقوۆا.

باسقارما كەلتىرگەن دەرەكتەرگە سايكەس، 2018 -جىلدىڭ 1 - ساۋىرىندەگى جاعداي بويىنشا، جەكە تۇلعالاردىڭ سالىق قارىزى 24,4 ميلليارد تەڭگەنى قۇراعان. بورىشكەرلەر سانى - شامامەن 1 ميلليون 335 مىڭ ادام.

فوتو: novostipmr.com

اۆتور: ايجان سەرىكجان قىزى