ەلىمىزدە توتەنشە جاعداي رەجيمىن بۇزعان 64 ادام قاماۋعا الىندى
بۇل تۋرالى «حابار 24» تەلەارناسىنىڭ تىكەلەي ەفيرىنەن ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«بىردەن ايتايىن، ازاماتتارىمىزدىڭ باسىم بولىگى توتەنشە جاعداي رەجيمى تالاپتارىنا تۇسىنىستىكپەن قارايدى. دەگەنمەن، بارلىعى بىردەي ولاي ويلامايدى. نەگىزىنەن زاڭبۇزۋشىلىقتار اكىمشىلىك قۇقىق بۇزۋ تۋرالى كودەكستىڭ 476-بابى بويىنشا ورىن الۋدا. جاۋاپكەرشىلىك شاراسى - 10 ا ە ك- كە دەيىن ايىپپۇل نەمەسە 15 تاۋلىككە قاماۋ»، - دەدى مينيستر.
ونىڭ ايتۋىنشا، وكىنىشكە قاراي، شەكتەۋلەرگە قاراماستان بارلىق وڭىردە تويلار مەن جيىندار، سالتاناتتى شارالار ءوتىپ جاتىر. كافەلەر مەن ينتەرنەت-كلۋبتار، بالالارعا ارنالعان ۇيىرمەلەر جۇمىس ىستەپ تۇر.
«وسىنداي 313 دەرەك انىقتالدى. 94 ادام جاۋاپقا تارتىلىپ، ونىڭ 64 ءى قاماۋعا الىندى»، - دەدى داۋرەن ابايەۆ.