ەلىمىزدىڭ ۇزدىك 64 ۇستازى ميلليونەر اتاندى

نۇر- سۇلتان. قازاقپارات - بۇگىن ەلورداداعى «قازاقستان» ورتالىق كونسەرت زالىندا «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى قازاقپارات ءتىلشىسى.

كونكۋرس ناتيجەسىندە تەحنيكالىق جانە كاسىپتىك ءبىلىم جۇيەسى بويىنشا «2019 -جىلدىڭ ۇزدىك پەداگوگى» رەسپۋبليكالىق كونكۋرسىندا 16 ۇستاز اتاندى. ولاردىڭ قاتارىندا قاراعاندى گۋمانيتارلىق كوللەدجىنىڭ تاريح جانە قوعامدىق- ساياسي پاندەر وقىتۋشىسى التاي اياعانوۆ، د. مۋسين اتىنداعى كوكشەتاۋ جوعارى قازاق پەداگوگيكالىق كوللەدجىنىڭ پەداگوگيكا وقىتۋشىسى باقىتگۇل باتاناسوۆا، سەمەي قالاسى م. و. اۋەزوۆ اتىنداعى پەداگوگيكالىق كوللەدجدىڭ جالپى پاندەر وقىتۋشىسى بەيبىتگۇل كالكەنوۆا سىندى ۇلاعاتتى ۇستازدار بار. ال مەكتەپكە دەيىنگى جانە ورتا ءبىلىم جۇيەسى بويىنشا «2019 -جىلدىڭ ۇزدىك پەداگوگى» رەسپۋبليكالىق كونكۋرسىنىڭ جەڭىمپازدارىنىڭ قاتارىنا 48 مۇعالىم ىلىگىپ وتىر. ۇزدىك پەداگوگتار قاتارىندا نۇر- سۇلتان قالاسى № 62 مەكتەپ- ليتسەيىنىڭ گەوگرافيا ءپانىنىڭ مۇعالىمى الما تۇرعامبەكوۆا، شىمكەنت قالاسى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبى فيليالىنىڭ دەنە شىنىقتىرۋ ءپانىنىڭ مۇعالىمى ەربول تلەۋلوۆ، اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ- ينتەرناتىنىڭ قازاق ءتىلى مەن ادەبيەت پاندەرىنىڭ مۇعالىمى دينارا ورىنبايەۆا، شىعىس قازاقستان وبلىسى سەمەي قالاسى شاكارىم اتىنداعى ءۇش تىلدە وقىتاتىن كوپبەيىندى گيمنازياسىنىڭ باستاۋىش سىنىپ مۇعالىمى نۇرگۇل مۇقانوۆا سىندى مۇعالىمدەر ماراپاتقا يە بولدى.

ەستەرىڭىزگە سالا كەتسەك، 8 جىل ىشىندە اتالعان بايقاۋعا  35127 پەداگوگ قاتىستى. ونىڭ ىشىندە مەكتەپكە دەيىنگى جانە ورتا، تەحنيكالىق جانە كاسىپتىك ءبىلىم بەرۋ جۇيەسىندەگى 432 پەداگوگ 1000 ا ە ك كولەمىندە اقشالاي سىياقىمەن جانە «ۇزدىك پەداگوگ» بەلگىسىمەن ماراپاتتالعان ەدى.

جالپى اۋداندىق (قالالىق) كەزەڭ؛ وبلىستىق كەزەڭ؛ رەسپۋبليكالىق كەزەڭدەردەن ءوتتى. بيىلعى جىلى بايقاۋدىڭ رەسپۋبليكالىق كەزەڭىنە 178 پەداگوگ قاتىستى. ولاردىڭ ىشىندە 64 پەداگوگ ۇزدىك اتاندى.

اۆتور مارلان جيەمباي