ۇيدەن شىقپاي جۇرگىزۋشى كۋالىگىن اۋىستىرۋ: ونلاين قىزمەتتى 6400 ادام پايدالانعان
بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءتوراعاسى ابىلايحان وسپانوۆ فەيسبۋك پاراقشاسىندا جازدى، دەپ حابارلايدى قازاقپارات ءتىلشىسى.
«مەن بۇعان دەيىن جۇرگىزۋشى كۋالىگىن ونلاين رەجيمدە اۋىستىرۋعا بولاتىنىن ايتقان ەدىم. ايتپاقشى، مەنىڭ ءوزىم دە جاقىندا اتالمىش قىزمەتتى پايدالانىپ، فوتوسۋرەتىم مەن قولتاڭبامدى تەلەفونعا ءتۇسىرىپ، وتىنىممەن بىرگە جولدادىم. ءسىز وسى ارقىلى ءوزىڭىزدىڭ 2 ساعاتىڭىزدى ۇنەمدەي الاسىز. بىزدە وسىعان دەيىن 6400 ادام جۇرگىزۋشى كۋالىگىن ونلاين تۇردە العان. ونىڭ ۇستىنە، اسەت تۇرىسوۆ («ۇلتتىق اقپاراتتىق تەحنولوگيالار» ا ق باسقارما ءتوراعاسى - اۆت.) جاڭا ديزايندى تاڭداۋعا بولاتىنىن جاريا ەتتى»، - دەدى الەۋمەتتىك جەلىدەگى پاراقشاسىندا ابىلايحان وسپانوۆ.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءتوراعاسى وسى جازبا ارقىلى جۇرگىزۋشى كۋالىگىن قالاي ونلاين اۋىستىرۋعا بولاتىنى تۇسىندىرىلگەن شاعىن ۆيدەومەن ءبولىستى.
ەسكە سالا كەتسەك، ءبىز بۇعان دەيىن ۇيدەن شىقپاي جۇرگىزۋشى كۋالىگىن قالاي جاڭارتۋعا بولاتىنىن جازعان بولاتىنبىز. ەلەكتروندى ۇكىمەت پورتالى (egov.kz) ارقىلى ونلاين تارتىپتە جۇرگىزۋشى كۋالىگىن قالاي اۋىستىرۋ كەرەكتىگىن مامىردا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قوعاممەن بايلانىس دەپارتامەنتىنىڭ ديرەكتورى مۇرات جۇمانباي ءوزىنىڭ فەيسبۋك پاراقشاسىندا جاريالادى.