الماتىدا وكپەسىنىڭ 64 پايىزى قابىنعان 87 جاستاعى اجەي جازىلىپ شىقتى
بۇل تۋرالى ونلاين- بريفينگ كەزىندە پسيحيكالىق ساۋىقتىرۋ ورتالىعىنىڭ ديرەكتورى ساپار راحمەنشەيەۆ مالىمدەدى.
ونىڭ ايتۋىنشا، پسيحيكالىق ساۋىقتىرۋ ورتالىعىنىڭ م. ماقاتايەۆ كوشەسىندەگى فيليالى پاندەمياعا بايلانىستى پروۆيزورلىق ورتالىققا اينالىپ جۇمىس جاساۋدا.
وسىدان ەكى- ءۇش اپتا بۇرىن مۇندا كۇنىنە 20-25 ناۋقاس تۇسكەن بولسا، قازىر ورتا ەسەپپەن 8-10 ادامعا ازايدى.
«پسيحيكالىق ساۋىقتىرۋ ورتالىعىنىڭ م. ماقاتايەۆ كوشەسىندەگى فيليالى 5-ناۋرىزدان باستاپ پروۆيزورلىق ورتالىققا اينالىپ، قىزمەت جاساپ كەلەدى. شەتەلدەن ۇشىپ كەلگەن 1800 ازاماتتىڭ بارلىعى وسى ورتالىقتا بولدى. ونىڭ 152 نەن ينفەكسيا انىقتالىپ، ولاردى جۇقپالى اۋرۋلار اۋرۋحاناسىنا اۋىستىردىق. ءبىرىنشى شىلدەدەن باستاپ ءبىزدىڭ ورتالىقتا 350 پروۆيزورلىق توسەك جاسالدى. ياعني م. ماقاتايەۆ كوشەسىندەگى ورتالىقتا 180 توسەك بولسا، ءا. كەكىلبايەۆ كوشەسىندە - 170»، - دەدى سپيكەر.
پروۆيزورلىق ورتالىقتا 296 مەديتسينا قىزمەتكەرى جۇمىس جاسايدى.
«وكپەسى قابىنعان ناۋقاستارعا ساپالى مەديتسينالىق كومەك كورسەتىلەدى. سىرقاتتارعا قابىنۋعا، باكتەرياعا قارسى، سونداي-اق انتيكووگۋليانتتى تەراپيا جانە وكسيگەنوتەراپيا قولدانىلادى. بۇل ەمنىڭ ءبارى دەنساۋلىق ساقتاۋ مينيسترلىگىنىڭ بەكىتكەن حاتتاماسى بويىنشا جۇرگىزىلۋدە. ءبىزدىڭ ورتالىقتا 10 رەانيماتسيالىق توسەك جانە 6 ي ۆ ل اپپاراتى بار. جىل سوڭىنا دەيىن تاعى 4 ي ۆ ل اپپاراتىن الامىز دەپ جوسپارلاپ وتىرمىز»، - دەدى ورتالىق باسشىسى.
وسى ايدىڭ باسىنان اتالعان پروۆيزورلىق ورتالىقتان 499 ادام ەم الىپ، جازىلىپ شىققان. ونىڭ ىشىندە 87 جاستاعى اجەي دە بار.
«1933 -جىلى تۋعان اپامىز ءبىزدىڭ اۋرۋحاناعا ءتۇسىپ، 18 كۇن جاتىپ، ەم قابىلدادى. بەس كۇن رەانيماتسيادا جاتتى. ك ت رەنتگەنى ارقىلى وكپەسىنىڭ 64 پايىزى قابىنعانى انىقتالدى. ول كىسى ءتيىستى ەمنىڭ ارقاسىندا ون سەگىز كۇننىڭ ىشىندە ساۋىعىپ شىقتى»، - دەيدى ساپار راحمەنشەيەۆ.
ايتا كەتسەك، پروۆيزورلىق ورتالىق اشىلعالى بەرى جاسى 55-تەن جوعارى 207 ناۋقاس ەمدەلگەن. ونىڭ 152 سى جازىلىپ شىقسا، قالعاندارى ەم قابىلداپ جاتىر. بۇگىندە ماقاتايەۆ كوشەسىندەگى پروۆيزورلىق ورتالىقتا 103 ادام، ال ءا. كەكىلبايەۆ كوشەسىندەگى ورتالىقتا 125 ناۋقاس ەم الۋدا. ياعني بۇرىنعىداي ەمەس ناۋقاستار سانى ازايعان ءارى بوس ورىندار دا بار. ديرەكتوردىڭ ايتۋىنشا، پاندەمياعا قاراماستان ورتالىق ءوزىنىڭ تىكەلەي مىندەتتەرىن توقتاتقان جوق.
ياعني ديسپانسەرلىك باقىلاۋدا تۇرعان پسيحيكالىق يا بولماسا ناركولوگيالىق اۋىتقۋلارى بار اۋرۋلاردى ورتالىققا جاتقىزىپ، ەمدەۋ جۇرگىزىلۋدە. پسيحولوگيالىق كومەك كورسەتۋ دە توقتاتىلعان جوق.
اۆتور: گۇلميرا عوسمانالي