شەتەلدىكتەردىڭ قاتىسۋىمەن 63 ميلليارد دوللاردىڭ جوبالارى ىسكە اسىرىلىپ جاتىر
بۇل تۋرالى «حالىقارالىق قاتىناستاردىڭ قازىرگى زامانعى جۇيەسىندەگى قازاقستان رەسپۋبليكاسى» اتتى حالىقارالىق كونفەرەنسيا بارىسىندا ق ر سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى. «ەكونوميكالىق ديپلوماتياعا جانە شەتەلدىك ينۆەستيتسيانى تارتۋ جونىندەگى مەملەكەتتىك ساياساتقا ەرەكشە كوڭىل بولەمىز. 30 جىل ىشىندە ەلىمىزدىڭ ەكونوميكاسىنا 380 ميلليارد دوللاردان استام تىكەلەي شەتەلدىك ينۆەستيتسيا تارتۋعا قول جەتكىزىپ، ينۆەستورلار ءۇشىن وڭىرلىك حابقا اينالدىق. 2021-جىلدىڭ قورىتىندىسىندا 6 مىڭنان استام جۇمىس ورنى قۇرىلعان، جالپى سوماسى 3,67 ميلليارد دوللارعا شەتەلدىكتەردىڭ قاتىسۋمەن 44 ينۆەستيتسيالىق جوبا پايدالانۋعا بەرىلدى. قازىر KAZAKH INVEST- پەن بىرلەسە وتىرىپ، 63 ميلليارد دوللار سوماسىنا شەتەلدىكتەردىڭ قاتىسۋىمەن 450 جوبا بويىنشا جۇمىس جۇرگىزىلۋدە»، - دەدى مينيستر.
ونىڭ اتاپ وتۋىنشە، حالىقارالىق ينۆەستيتسيالار ءۇشىن باسەكەلەستىكتىڭ كۇشەيۋى جاعدايىندا ەلدىڭ ينۆەستيتسيالىق تارتىمدىلىعىن ارتتىرۋ بويىنشا جۇيەلى شارالار قابىلداپ جاتىر.
«وتكەن اپتادا عانا ۇكىمەت ەلىمىزدىڭ 2026-جىلعا دەيىنگى ينۆەستيتسيالىق ساياساتىنىڭ جاڭا تۇجىرىمداماسىن بەكىتتى. قۇجات قوسىلعان قۇنى جوعارى تاۋارلاردى باسەكەگە قابىلەتتى وندىرۋگە باعىتتالعان ينۆەستيتسيالاردىڭ قۇرىلىمىن وزگەرتۋ بويىنشا شارالار كەشەنىن جۇزەگە اسىرۋدى كوزدەيدى»، - دەدى مۇحتار تىلەۋبەردى.