استانا تۇرعىنى ءوزىنىڭ اعاسىن 63 جىلدان كەيىن تاۋىپ الدى
«وتكەن جولى ايتقان اعاممەن اقىرى كەزدەستىم. ونىڭ ۇيدەن كەتىپ قالعانىنان بەرى 63 جىل ءوتىپ كەتىپتى! ول مەن دۇنيەگە كەلمەي تۇرىپ جوعالعان. مىنە، ءبىز قازىر كەزدەستىك. مەرەكەلىك داستارحاندا بىرنەشە ساعات بويىنشا اڭگىمە-دۇكەن قۇردىق»، - دەدى ول قازاقپارات ءتىلشىسىنىڭ سۇراعىنا جاۋاپ بەرە وتىرىپ.
ايتا كەتەرلىگى، بىرنەشە كۇن بۇرىن مارات ماناسپايەۆ ءوزىنىڭ Facebook پاراقشاسىندا الداعى كەزدەسۋى تۋرالى ايتىپ بەرگەن بولاتىن.
«1955 -جىلى ءىز-ءتۇسسىز جوعالعان مەنىڭ نەمەرە اعام سوۆەت 63 جىلدان كەيىن تابىلدى. ول سوعىستا جوعالىپ كەتكەن جوق. سوعىس كەزىندە ونىڭ اكەسى - مەنىڭ اكەمنىڭ اعاسى اققازى جوعالىپ كەتكەن ەدى. 1941 -جىلى مايدانعا ءتورت اعايىندى: اققازى، قۇسايىنعازى، نۇرعازى مەن حاسەن كەتكەن بولاتىن. سوعىستان تەك ەكەۋى - مەنىڭ اكەم مەن باۋىرى حاسەن ورالدى»، - دەپ جازدى مارات ماناسپايەۆ سول كەزدە.
ونىڭ ايتۋىنشا، شەشەسى سوۆەتتىڭ 8 جاسىندا كوز جۇمعان. جاس بالانى اتاسى جامپەيىس پەن اجەسى ءدامبۇبى اسىراپ الادى. 1953 -جىلى - مارات تۋعاننان 3 اي بۇرىن اتالارى دۇنيە سالادى. ودان كەيىن سوۆەتتى اجەسى مەن شاكەن جەڭگەسى وسىرگەن.
«1955 -جىلى قانداي جاعداي بولعانىن ءبىز بىلمەيمىز. ءبىراق، مەنىڭ قايتىس بولعان انامنىڭ ايتۋىنشا، سول كەزدە ەس جيىپ قالعان جاس جىگىت ەشكىمگە ءتىس جارماي، ۇيدەن كەتىپ قالعان. سودان بەرى ودان ءبىر حابار بولماسا كەرەك. بالا كەزىمدە كيىم تىگىپ وتىرىپ، شەشەمنىڭ ءجيى كوز جاسىنا ەرىك بەرىپ وتىرعانىن كورەتىن ەدىم. ءبىز ۇيدە توعىز بالا بولدىق. اكەمىز ەرتە كەتكەننەن كەيىن ول ءبىزدى جالعىز ءوسىردى. ءبىز ونى تىرلىكتىڭ قامىتىن كوتەرە الماي، جىلايدى دەپ ويلايتىن ەدىك. الايدا ول كوز جاسىن ءسۇرتىپ، ەسىنە «سوقىر سوۆەت» ءتۇسىپ كەتەتىنىن ايتاتىن ەدى»، - دەيدى مارات ماناسپايەۆ.
انىقتالعانىنداي، مارات تۋىسقانىن كەزدەيسوق تاۋىپ العان.
«سوۆەتتىڭ الماتىدا تۇرىپ جاتقان قىزى ليۋتسيا جولىن تاۋىپ مەنىڭ ءىنىم - سەمەيدە تۇرىپ جاتقان الماس ماناسپايەۆقا حابارلاسقان. جاعدايدى بىلىسكەننەن كەيىن ءىنىم ليۋتسيانى استانادا تۇرىپ جاتقان قىزىم رايلياعا باعىتتاپتى. كەيىن ءبارى بەلگىلى بولدى - سوۆەت ءبىزدىڭ جوعالىپ كەتكەن اعامىز بولىپ شىقتى. وسى ۋاقىتقا دەيىن ول استاناداعى قىرقىنشى ستانسادا تۇرىپ جاتقان ەكەن. ءبىر سوزبەن، 20 جىل جىلداي جاپ-جاقىن جەردە ءومىر ءسۇرىپ جاتقانىمىزبەن، ءبىر-ءبىرىمىز تۋرالى ەشتەڭە بىلمەپپىز»، - دەيدى ول.
اعايىندار وسىلاي قىرقىنشى ستانسادا تابىسقان. ماراتتىڭ اعاسىنىڭ ءۇيىن ىزدەپ كوپ شارشاماعانىن ايتادى. تەمىرجول كەنتىندە سوۆەتتى تۇرعىنداردىڭ ءبارى تانيتىن بولىپ شىقتى.
«ستانسادا ءبارى ءبىرىن-ءبىرى جاقسى بىلەدى ەكەن. اعامىزدى ىزدەپ، اۋىلدى ارالاپ جۇرگەنىمىزدە كوشەدەن ءوتىپ بارا جاتقان ءبىر كىسىدەن اباي كوشەسىنىڭ قايدا ەكەنىن سۇرادىق. ول كىمدى ىزدەپ جۇرگەنىمىزدى سۇرادى. اعامىزدىڭ اتىن اتاپ ەدىك - ول ءبىزدى سول كىسىنىڭ ۇيىنە الىپ باردى. وسىلايشا، اعامىزبەن تابىسىپ، بىرنەشە ساعات تىلدەستىك»، - دەيدى مارات ماناسپايەۆ.
ايان بەكەن ۇلى