ەلجان ءبىرتانوۆ: مەديتسينالىق كادرلار تاپشى ەلدى مەكەندەرگە 6300 جاس مامان جىبەرىلەدى
بۇل تۋرالى ۇكىمەتتىڭ باسپا ءسوز ورتالىعىندا دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى، دەپ حابارلايدى قازاقپارات ءتىلشىسى.
«ەڭ باستى ۇلكەن ماسەلە - كادرلاردىڭ جەتىسپەۋشىلىگى. شىنىندا دا، مەديتسينالىق قىزمەت ساپاسىنىڭ تومەندەۋىنە كوپ جاعدايدا مەديتسينالىق قىزمەتكەرلەردىڭ جەتىسپەۋشىلىگى سەبەپ بولىپ جاتادى. كەيبىر ەلدى مەكەندەردە، اسىرەسە اۋىلداردا ۋچاسكەلىك دارىگەرلەر اۋىر - ەكى ەسە جۇكتەمەمەن جۇمىس جۇرگىزۋدە. بۇنىڭ ارتى البەتتە، مەديتسينالىق قىزمەت ساپاسىنىڭ تومەندەۋىنە الىپ كەلەدى. سول سەبەپتى، بۇل رەتتە قانداي ماسەلەلەر قولعا الىنادى؟ ەڭ الدىمەن، وسى جىلدان باستاپ 10 ج و و مەن عىلىمي- زەرتتەۋ ينستيتۋتتارىنان 6300 مەديتسينا قىزمەتكەرى وقۋىن ءبىتىرىپ شىعادى. بۇگىنگى تاڭدا جاڭا زاڭناماعا سايكەس، ولار ناقتى مەديتسينالىق ۇيىمدارعا جىبەرىلەدى. جاس ماماندارعا ءۇش جىلدىق مىندەتتى ەڭبەك جۇكتەلىپ وتىرعانىن ايتا كەتۋ كەرەك. ەڭ الدىمەن، بۇل رەتتە اۋىلدى جەرلەردەگى مەديتسينالىق ۇيىمداردىڭ قاجەتتىلىگىنە ءمان بەرەمىز»، - دەيدى ەلجان ءبىرتانوۆ ۇكىمەتتىڭ باسپا ءسوز ورتالىعىندا.
مينيستر ءوز سوزىندە كادر ماسەلەسى بويىنشا جەرگىلىكتى اتقارۋشى ورگاندارمەن ءتيىستى جۇمىستار جۇرگىزىلگەنىن تىلگە تيەك ەتتى.
«مەملەكەت تاراپىنان كورسەتىلەتىن قولداۋ شارالارىنا تالداۋ جۇمىستارى جۇرگىزىلدى. تۇلەكتەردى بەلگىلى ءبىر اۋىلعا بەكىتۋ جۇمىستارى اياسىندا مىندەتتى تۇردە مەملەكەت تاراپىنان قولداۋ كورسەتىلەتىن بولادى»، - دەيدى ول.
ايتا كەتسەك، ۇكىمەتتىڭ باسپا ءسوز ورتالىعىندا ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىنىڭ نەگىزگى باعىتتارىن ءتۇسىندىرۋ بويىنشا وڭىرلەرگە جاساعان جۇمىس ساپارلارى قورىتىندىلاندى.
اۆتور: ايان بەكەن ۇلى