استاناداعى تۇرمىسى تومەن وتباسىلاردىڭ ۇيىنە گاز تارتۋعا 62,5 ميلليون تەڭگە ءبولىندى
«ۇيلەرگە گاز تارتۋ جۇمىسىن جەڭىلدەتۋ ءۇشىن وسىعان دەيىن ءبىرقاتار شارالار قابىلدادىق: قاجەتتى قۇجاتتار ءتىزىمى قىسقاردى، جاعدايى تومەن وتباسىلارعا بولىنەتىن سوما 2 ەسە ۇلعايدى، ەسەپتەگىشتەر (گازدى ەسەپتەۋ قۇرىلعىلارى) تەگىن بەرىلەدى، سول سياقتى پايىزسىز نەسيە بەرۋ باعدارلاماسى دا بار.
مۇقتاج ازاماتتار ۇيىنە گاز قوسۋ ءۇشىن الەۋمەتتىك كومەك الا الادى. ءساۋىر ايىنان باستاپ ماتەريالدىق كومەك كولەمى ەكى ەسە ارتىپ، 410 مىڭ تەڭگەدەن (130 ا ە ك- كە دەيىن) استى.
وسى الەۋمەتتىك كومەك بويىنشا تامىز ايىندا 188 وتباسى ءوتىنىش ءبىلدىردى، ونىڭ 178 ىنە تاعايىندالدى. كومەك العاندار اراسىندا زەينەتكەرلەر، مۇگەدەكتىگى بار جاندار، كوپبالالى وتباسىلار جانە ت. ب. بار. جالپى سوماسى - 62,5 ميلليون تەڭگەدەن استام.
الەۋمەتتىك كومەكتىڭ بۇل ءتۇرىن الۋ ءۇشىن ءوتىنىمدى egov.kz پورتالى ارقىلى بەرۋ قاجەت. «كۇتىپ ۇستاۋ» باعانىندا تۇرعىن ءۇيدى گازداندىرۋ بويىنشا الەۋمەتتىك كومەك، ال «الۋشى» باعانىندا - جۇمىسپەن قامتۋ جانە الەۋمەتتىك قورعاۋ باسقارماسى تاڭدالۋى قاجەت. گازداندىرۋ جۇمىسى مەملەكەت باسشىسىنىڭ تىكەلەي باقىلاۋىندا»، - دەپ جازدى التاي كولگىنوۆ.
اكىمنىڭ ايتۋىنشا، سارىارقا جانە الماتى اۋداندارى تولىقتاي كوگىلدىر وتىنمەن قامتاماسىز ەتىلگەن. 680 كم استام گاز تاراتۋ جەلىسى سالىنىپ، كۆارتالىشىلىك جەلىلەر تارتىلدى. 14 مىڭ ابونەنت گازعا قول جەتكىزدى، 6 مىڭنان استام ابونەنت تەحنيكالىق شارت الدى، 4,6 مىڭنان استام ءۇي گاز قۇبىرىنا قوسىلدى. سونداي- اق، الەۋمەتتىك نىساندار گازبەن جابدىقتالدى.
بايقوڭىر جانە ەسىل اۋداندارىندا گاز قۇبىرىن تارتۋ جۇمىسى باستالدى. يلينكا (ۇركەر)، ءوندىرىس، پريگورودنىي، تەلمان ەلدى مەكەندەرى، «Family Village « ، «Garden Village « شاعىن اۋداندارى جانە باسقاسىندا جۇمىس ءجۇرىپ جاتىر. «شۇبار» شاعىن اۋدانىندا جوبالاۋ جۇمىسى باستالدى.
ال، ەسىل جانە بايقوڭىر اۋداندارىندا الدىمەن جەتكىزۋشى گاز قۇبىرى، كەلەر جىلى كۆارتالىشىلىك جەلىلەر سالىنباق.