ترامپ پەن پۋتين كەزدەسۋىنە 61 مەملەكەتتەن 1 جارىم مىڭ جۋرناليست كەلگەن

استانا. قازاقپارات- حەلسينكيدە رەسەي پرەزيدەنتى ۆلاديمير پۋتين مەن ا ق ش پرەزيدەنتى دونالد ترامپتىڭ جەكە جۇزدەسۋى اياقتالدى. ەكى ەل باسشىسىنىڭ كەزدەسۋى 2 ساعاتتان استام ۋاقىتقا سوزىلدى.

 وسىدان كەيىن ولارعا قالعان دەلەگاتسيا مۇشەلەرى قوسىلىپ، كەڭەيتىلگەن فورماتتا كەلىسوز باستالدى. ول شامامەن 1 ساعات 45 مينۋتقا جوسپارلانعان. ال اق ءۇي باسشىسى رەسەيلىك ارىپتەسىمەن كەزدەسۋدى «جاقسى باستاما» دەپ اتاپ، ەكى ەل اراسىنداعى بارلىق ماسەلەنى تالقىلاۋدىڭ ۋاقىتى جەتكەنىن ايتتى.

ۆلاديمير پۋتين مەن دونالد ترامپتىڭ كەزدەسۋى الدىن الا دايىندالعان باعدارلاماعا سايكەس دەپ ايتۋعا كەلمەيدى. رەسەي پرەزيدەنتى حەلسينكيگە جەرگىلىكتى ۋاقىت بويىنشا تۇسكى ساعات 1 دە كەلدى. ءسويتىپ كەزدەسۋ 1 ساعاتقا كەش باستالدى. ال دونالد ترامپ فينلياندياعا جەكسەنبى كۇنى كەشكىسىن كەلگەن.

ايتا كەتەيىك، ەكى مەملەكەت باسشىلارىنىڭ كەزدەسۋى العاش رەت كەلىسىلگەن كۇن ءتارتىبىنسىز ءجۇرىپ جاتىر. ساراپشىلار بۇگىن ەڭ وزەكتى دەگەن 5 ماسەلە تالقىلانادى دەپ بولجاپ وتىر. ولار قارۋ- جاراقتى باقىلاۋ، رەسەيگە قاتىستى امەريكالىق سانكسيالار، ۋكراينا مەن سيريا ماسەلەسى جانە «سولتۇستىك اعىن-2» گاز قۇبىرى جوباسى بولماق. باسقوسۋدىڭ قورىتىندىسى بويىنشا ەكى ەل باسشىسىنىڭ بىرلەسكەن باسپا ءسوز ءماسليحاتى جوسپارلانعان. بۇعان دەيىن سامميت شەڭبەرىندە ا ق ش- تىڭ مەملەكەتتىك حاتشىسى مايك پومپەو مەن رەسەي سىرتقى ىستەر ءمينيسترىنىڭ كەزدەسۋى ءوتتى. ال سامميتكە الەم ءجىتى نازار تىگىپ وتىر. وعان دۇنيە ءجۇزىنىڭ 61 مەملەكەتىنەن 1 جارىم مىڭ جۋرناليست كەلگەن. ءبىر رەسەيدىڭ وزىنىنەن 200-دەي ب ا ق وكىلى قاتىسۋدا.

www.24.kz