كەيىنگى ەكى جىلدا 60 قا تارتا جاياۋ ادامدى ۆەلوسيپەد قاعىپ كەتكەن

استانا. قازاقپارات - پرەمەر-ءمينيستردىڭ ءبىرىنشى ورىنباسارى رومان سكليار ءماجىلىس دەپۋتاتتارىنىڭ ساۋالىنا بەرگەن جاۋابىندا رەسمي كولىك تۇرىنە جاتقىزىلماعان قوزعالىس قۇرالدارىنىڭ كەسىرىنەن زارداپ شەككەندەردىڭ ستاتيستيكاسىن جاريالادى، دەپ حابارلايدى قازاقپارات ءتىلشىسى.

«قازىرگى تاڭدا قوعامدا اتالعان قۇرالداردى تىزگىندەۋ كەزىندە جول ەرەجەسىن بۇزۋدىڭ كەز كەلگەن فورماسىنا توزبەۋشىلىك قالىپتاسىپ كەلەدى. دەنساۋلىق ساقتاۋ ۇيىمدارىنىڭ دەڭگەيىندە ەلەكترلى ساموكاتتاردان جانە وزگە دە قوزعالىس قۇرالدارىنان زارداپ شەككەندەردىڭ ەسەبى جۇرگىزىلەدى. «ستاتسيونارداعى ناۋقاستاردىڭ ەلەكتروندى ءتىزىلىمى» اقپارات جۇيەسىنىڭ دەرەگى بويىنشا، 2021 -جىلى 25 جاياۋ جۇرگىنشى ۆەلەوسيپەدپەن سوقتىعىسىپ زارداپ شەكسە، 2022 -جىلى 33 ادام، بيىل العاشقى 3 ايدا 4 ادام زارداپ شەككەن. وزگە ناقتىلانباعان كولىكتەردەن 2021 -جىلى 50 ادام، 2022 -جىلى 51 ادام، بيىلعى ءبىرىنشى توقساندا 10 ادام زارداپ شەككەن» دەپ جازىلعان جاۋاپتا.

سونداي-اق، ول جاۋاپتا اتالمىش قوزعالىس قۇرالدارىن تىزگىندەۋ كەزىندە زاڭ بۇزعان ادامداردىڭ مالىمەتىن قايدا جولداۋعا بولاتىنىن ەسكە سالادى.

«جول قوزعالىسىنىڭ قاۋىپسىزدىگىن قامتاماسىز ەتۋدە، ونىڭ ىشىندە قاسكوي ەرەجە بۇزۋشىلاردى انىقتاۋدا ازاماتتار بەلسەندىلىك تانىتىپ ءجۇر. ولارمەن بۇل تۇرعىداعى اقپارات الماسۋ جۇمىسى ەلەكتروندى ۇكىمەت پورتالى مەن «ە-ءوتىنىش» پلاتفورماسى ارقىلى جولعا قويىلعان. سونداي- اق، ىشكى ىستەر مينيسترلىگى 2020 -جىلدان بەرى «102» موبيلدى قوسىمشاسى ارقىلى ازاماتتاردان دىبىس جانە بەينەحابارلاما ارقىلى اقپارات الىپ كەلەدى. ونىڭ ىشىندە جول ەرەجەسىن بۇزعان ەلەكترلى ساموكات تىزگىندەۋشىلەر دە بار»، - دەيدى ءبىرىنشى ۆيتسە-پرەمەر.

رومان سكلياردىڭ مالىمەتى بويىنشا، بۇگىندە ۆەلوسيپەد جولى استانادا (70 شاقىرىم)، الماتىدا (80,4 شاقىرىم)، تۇركىستان وبلىسىندا (105 شاقىرىم)، اتىراۋ وبلىسىندا (24,2 شاقىرىم) بار.