شىعىس قازاقستان وبلىسىندا 60-قا جۋىق ادام قوس ازاماتتىقپەن جۇرگەن
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءتارتىپ ساقشىلارى ءوڭىر اۋماعىندا قوس ازاماتتىعى بار ادامداردى انىقتاۋ بويىنشا جۇمىستى جالعاستىرىپ جاتىر.
«زاڭ بويىنشا باسقا ەلدىڭ ازاماتتىعىن الۋدى ۇيعارعان ادام ەڭ اۋەلى قازاقستاندىق ازاماتتىقتان باس تارتۋى قاجەت. ول ءۇشىن 30 كۇن مەرزىم ىشىندە ىشكى ىستەر ورگاندارىن وزگە مەملەكەتتىڭ ازاماتتىعىن الۋدى جوسپارلاعانىن حابارلاپ، ق ر پاسپورتى مەن جەكە كۋالىگىن تاپسىرۋى قاجەت. وكىنىشكە قاراي، شىعىس قازاقستاننىڭ كەيبىر تۇرعىندارى بۇل ءراسىمدى ەلەمەيدى. سوندىقتان قوس ازاماتتىق فاكتىلەرىنىڭ ءوسۋى بايقالادى. ماسەلەن، 2022 -جىلى ش ق و پ د كوشى- قون قىزمەتى قوس ازاماتتىقپەن جۇرگەن 60-قا جۋىق ادامدى انىقتاعان. ال وسى جىلدىڭ قاڭتارىندا قۇقىق قورعاۋ ورگاندارى وسىنداي 6 قۇقىق بۇزۋشىنى تىركەدى»، - دەلىنگەن اقپاراتتا.
ۆەدومستۆو دەرەگىنشە، قوس ازاماتتىقتىڭ بىرنەشە سەبەبى بار.
اتاپ ايتقاندا، كارانتيندىك شەكتەۋلەر كەزەڭىندە مەملەكەتتىك شەكارادان كەدەرگىسىز ءوتۋ، توتەنشە جاعدايلار تۋىنداعان جاعدايدا شۇعىل ەميگراتسيا مۇمكىندىگى، ماتەريالدىق ارتىقشىلىقتار الۋ، اتاپ ايتقاندا زەينەتاقى ەسەبى، بالالار تۋعان كەزدەگى جاردەماقى جانە جوعارى وقۋ ورىندارىنا ءتۇسۋ كەزىندە جەڭىلدىك جاعدايلارى.
اۆتور
تالعاتجان مۇحامەتبەك ۇلى