جاز بويى 60-قا جۋىق كىتاپ وقىعان پاۆلودارلىق وقۋشىلار ۆەلوسيپەد ۇتىپ الدى
22 قىركۇيەك 08:38

جاز بويى 60-قا جۋىق كىتاپ وقىعان پاۆلودارلىق وقۋشىلار ۆەلوسيپەد ۇتىپ الدى

پاۆلودار. قازاقپارات - پاۆلوداردا 60-قا جۋىق كىتاپ وقىعان وقۋشىلار ۆەلوسيپەد ۇتىپ الدى. وقۋشىلار بۇل كىتاپتاردى 5 ايدا وقىپ شىققان، دەپ حابارلايدى Pavlodarnews.kz.

پاۆلودار قالاسىنىڭ ورتالىقتاندىرىلعان كىتاپحانالار جۇيەسى «ۇزدىك وقىرمان» بايقاۋىنىڭ جەڭىمپازدارىن ماراپاتتادى.

بايقاۋ 12-ءساۋىر مەن 1-قىركۇيەك ارالىعىندا ءوتتى. وعان قاتىسۋشىلار 7-دەن 15 جاسقا دەيىن جانە 16 جاستان جوعارى بولىپ ەكى توپقا ءبولىندى.

پاۆلودار قالاسىنىڭ ورتالىقتاندىرىلعان كىتاپحانالار جۇيەسى ديرەكتورىنىڭ ورىنباسارى ايبەك ورالحان بايقاۋعا 100-گە جۋىق ادام قاتىسقانىن اتاپ ءوتتى.

«بايقاۋ ءبىزدىڭ جۇيەگە قارايتىن 13 كىتاپحانا ارقىلى جۇرگىزىلدى. قالالىق وقىرماندار مەن قالا ماڭىنداعى اۋىلداردىڭ وقىرماندارى قاتىستى. ەكىنشى كەزەڭگە 15 كىتاپتان جوعارى وقىعان 34 وقىرماندى ىرىكتەپ الدىق. بىزدەن كىتاپ العان كەزدە فورمۋليارىندا كىتاپتاردىڭ ءتىزىمى مەن اۆتورلارى جازىلادى»، - دەدى ايبەك ورالحان.

قاتىسۋشىلاردىڭ ىشىندە ەڭ كوپ كىتاپ وقىعان - زەينەتكەر قۋات شۋاقبايەۆ. ول 109 كىتاپ وقىعان. ءبىراق ول دەنساۋلىعىنا بايلانىستى ەكىنشى كەزەڭگە قاتىسۋدان باس تارتقان.

« ەرەسەكتەر اراسىندا كوبىنە زەينەتكەرلەر قاتىستى. 80-گە جۋىق كىتاپ وقىعاندار بار. ءبىراق ولار ەكىنشى كەزەڭگە قاتىسۋدان باس تارتىپ، سىيلىقتى جاستارعا بەرۋدى ۇيعاردى. سوندىقتان ەكى ۆەلوسيپەد تە وقۋشىلارعا بۇيىردى»، - دەدى ايبەك ورالحان.

ايبەك ورالحاننىڭ ايتۋىنشا، جۇلدەگەرلەردى انىقتاۋ كەزىندە تىزىمدەگى كىتاپتار سانى ەمەس، ناقتى وقىعان كىتاپتار ەسەپكە الىنعان.

«بايقاۋ بارىسىندا بايقاعانىمىز - كەيبىر وقىرماندارىمىز كىتاپتاردى وتباسى مۇشەلەرىنە، كورشىلەرىنە الادى ەكەن. مىسالى، 30 كىتاپ السا، ونىڭ 10 ىن عانا ءوزى وقيدى. ەكىنشى كەزەڭدە بەلگىلى جازۋشىلاردان قۇرالعان قازىلار القاسى بايقاۋعا قاتىسۋشىلارعا سۇراقتار قويىپ، ناقتى كىتاپ وقىعانداردى انىقتادى. ىشىندەگى باستى كەيىپكەرلەر، سيۋجەتتەر بويىنشا، ءتىپتى كىتاپتىڭ مۇقاباسىنىڭ ءتۇسىن دە سۇراپ جاتتى. جالپى، كىتاپتى وقىعان ادام بەلگىلى بولادى. سۇراقتارعا مۇدىرمەي جاۋاپ بەرەدى. سوندىقتان ناقتى وقىلعان كىتاپتاردىڭ سانى ەسەپكە الىندى»، - دەدى ايبەك ورالحان.

بايقاۋ قورىتىندىسى بويىنشا ەڭ جاس وقىرمانداردىڭ ءبىرى 25 كىتاپ وقىعان №8-ليتسەيدىڭ 2-سىنىپ وقۋشىسى يگنات گايسين تريۋكتىك ساموكات جەڭىپ الدى.

سونداي-اق 59 كىتاپ وقىپ، سولاردىڭ مازمۇنى بويىنشا مۇدىرمەي جاۋاپ بەرگەن قالالىق №35-مەكتەپتىڭ 6-سىنىپ وقۋشىسى بەردىبەك جانىبەك ۇلى مەن 30 كىتاپ وقىعان كەنجەكول ورتا مەكتەبىنىڭ 4-سىنىپ وقۋشىسى بەكسۇلتان ساميعا ۆەلوسيپەد يەگەرلەرى اتاندى.

جەڭىمپازداردىڭ ءبىرى بەردىبەك جانىبەك ۇلى كۇنىنە كىتاپ وقۋعا 2-3 ساعات ارنايتىنىن اتاپ ءوتتى.

«بايقاۋعا وتباسىمىزبەن بىرگە قاتىستىق. انام مەن اكەم، باۋىرىم مەن قارىنداسىم دا كىتاپ وقىدى. ءوزىم 59 كىتاپ وقىدىم. ىشىندە بەردىبەك سوقپاقپايەۆتىڭ «مەنىڭ اتىم قوجا» كىتابى ۇنادى. قوجانىڭ وقۋشىلىق بەينەسىن جاقىن تۇتتىم»، - دەيدى بەردىبەك جانىبەك ۇلى.

قالالىق ورتالىقتاندىرىلعان كىتاپحانالار جۇيەسى وقىرمانداردى ىنتالاندىرۋ جۇمىستارىن توقتاتپايتىنىن اتاپ ءوتتى. الداعى ۋاقىتتا احمەت بايتۇرسىن ۇلىنىڭ 150 جىلدىعىنا ارنالعان بەينەروليكتەر بايقاۋىنىڭ قورىتىندىسى شىعارىلادى. وندا وقىرماندار وقىعان شىعارمالارىنىڭ نەگىزىندە بەينەروليك دايىندايدى.


جاڭالىقتار