باس ءمۇفتي: 60 جاستان اسقاندار، اۋىز بەكىتپەس بۇرىن مەديتسينالىق تەكسەرۋدەن وتىڭىزدەر
بۇل تۋرالى قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ايتتى، دەپ حابارلايدى قازاقپارات ءتىلشىسى.
«رامازاندا اۋىز بەكىتكەن ءيسى مۇسىلمان بالاسى ءوزىن ءىشىپ- جەۋدەن عانا شەكتەمەي، جانى مەن ءتانىن جاماندىقتان ساقتاپ، ىزگىلىككە ۇمتىلادى. ءىس- ارەكەتىن مۇسىلمانعا ءتان ادەپ اياسىندا ورىنداۋعا تىرىسادى. ويتكەنى، رامازان - كەز كەلگەن ىزگى امالدى رياسىز نيەتپەن جاساۋعا تاربيەلەيتىن، ادامدى تاقۋالىققا ۇيرەتەتىن اي. اشتىق پەن شولگە ءتوزىپ، اللا رازىلىعىن الۋدى شىنايى نيەت ەتكەن ادامعا بەرىلەتىن سىي مەن قۇرمەت ەرەكشە بولماق.
اللا تاعالا قۇدسي- حاديستە: «اۋزى بەرىك ادام ءىشىپ- جەۋىن مەن ءۇشىن دوعاردى. ورازا - مەن جانە قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ، مەن بەرەمىن. اۋزى بەرىك قۇلىمنىڭ اشتىق پەن شولدەۋ سەبەبىنەن شىققان اۋىز ءيىسى مەن ءۇشىن ميسك اتىرىنەن دە قايىرلى»، - دەگەن.
بۇگىندە قازاقستان مۇسىلماندارى ءدىني باسقارماسى حالقىمىزعا «يحسان ءىلىمىن» كەڭىنەن ناسيحاتتاپ كەلەدى. يحسان - پەندەنىڭ يمانىن بەكەمدەپ، قۇلشىلىققا دەگەن قۇلشىنىسىن ارتتىراتىن، ادامگەرشىلىككە ءتان يگى قاسيەتتەردى كەمەلدەندىرە تۇسەتىن رۋحاني ءىلىم. بۇل - ءار امالدى كوركەم تۇردە ورىنداۋعا ۇيرەتەتىن ءىلىم»، - دەدى باس ءمۇفتي ورتالىق كوممۋنيكاتسيالار قىزمەتىندەگى بريفينگ بارىسىندا.
وسى رەتتە ناۋرىزباي قاجى تاعان ۇلى رۋحاني كەمەلدەنۋ ايى - رامازاندا بارىنشا ادەپسىز ارەكەت پەن قاتە- كەمشىلىكتەن ارىلىپ، تۇلا بويىمىزدا كوركەم مىنەز قۇندىلىقتارىن قالىپتاستىرۋعا تىرىسقانىمىز ابزال ەكەنىن باسا ايتتى.
«وكىنىشكە قاراي، بيىل دا قاسيەتتى رامازان ايىن پاندەميا جاعدايىندا وتكىزگەلى وتىرمىز. جۇقپالى دەرتتى وقشاۋلانۋ، ساقتانۋ ارقىلى عانا جەڭۋگە بولاتىنىن انىق اڭعاردىق. وسى رەتتە سىزدەردى اۋىزاشار كەزىندە، قۇلشىلىق ساتتەرىندە سانيتارلىق تالاپتاردى قاتاڭ ساقتاۋعا شاقىرامىن. دەنساۋلىق - بارىنەن قىمبات قۇندىلىق، اللانىڭ ادامزاتقا بەرگەن اماناتى. وسى ورايدا جاسى 60-تان اسقان اعا- اپالارىمدى اۋىز بەكىتۋدەن بۇرىن مەديتسينالىق تەكسەرۋدەن ءوتىپ، دارىگەردىڭ ءتيىستى كەڭەسىن الۋعا شاقىرامىن. ەگدە جاستاعى جانە باليعاتقا تولماعان ازاماتتاردان كۇردەلى احۋال تۇراقتالعانشا مەشىتكە بارماي، قۇلشىلىقتى ۇيدە ورىنداۋىن سۇرايمىز»، - دەدى قازاقستان مۇسىلماندارى ءدىني باسقارماسىنىڭ ءتوراعاسى.
اۆتور: مارلان جيەمباي