الماتى وبلىسىندا 60 قا جۋىق مال ۇرلاعان قىلمىستىق توپ ۇستالدى

None
None
تالدىقورعان. قازاقپارات - الماتى وبلىسى جامبىل اۋدانىنىڭ ءتارتىپ ساقشىلارى مال ۇرلىعىن كاسىپ قىلدى دەگەن كۇدىككە ىلىنگەن قىلمىستىق توپتى قۇرىقتادى.

توپ قۇرامىندا 23-26 جاستاعى جەرگىلىكتى ءۇش تۇرعىن بولعان، دەپ حابارلايدى قازاقپارات ءتىلشىسى.

بۇلتارتپاس ايعاقتار ارقاسىندا ولاردىڭ مال ۇرلىعىنىڭ جەتى دەرەگىنە قاتىسى بارى دالەلدەندى. تەرگەۋ بارىسىندا وزدەرىنىڭ جىمىسقى ارەكەتتەرىن وتكەن جىلدىڭ تامىز ايىنان بەرى ىسكە اسىرعانى انىقتالدى.

«اتالعان دەرەكتەر بويىنشا ق ر قىلمىستىق كودەكسىنىڭ 188-بابى 3-بولىگىنە سايكەس سوتقا دەيىنگى تەرگەۋ امالدارى جۇرگىزىلىپ جاتىر. ولاردىڭ ءبىرقاتار مال ۇرلىعىنا، ونىڭ ىشىندە ءىرى مالمەن قاتار، قوي ۇرلىعىنا قاتىسى بارى دالەلدەندى. توپ مۇشەلەرىنە 3 جىلقىنى، 5 سيىردى جانە 48 قويدى ۇرلادى دەگەن ايىپ تاعىلدى. تۇرعىندارعا كەلتىرىلگەن ماتەريالدىق شىعىن ەسەپتەلۋدە»، - دەپ اتاپ ءوتتى وبلىستىق پوليتسيا دەپارتامەنتىنىڭ باسپا ءسوز قىزمەتىنەن.

جەدەل-ىزدەستىرۋ شارالارى بارىسىندا كۇدىكتىلەردەن ۇرلانعان مالدى ساتىپ الۋشى دا انىقتالدى. ءتارتىپ ساقشىلارى ساتىپ الۋشىدان قولدى بولعان 3 سيىردى تاركىلەپ، زاڭدى يەلەرىنە قايتاردى. اشكەرە بولعان قىلمىستاردىڭ ىشىندە مالىنىڭ قولدى بولعانى تۋرالى ىشكى ىستەر ورگاندارىنا حابار بەرمەگەن تۇرعىنداردىڭ دا مالى بار. ءتارتىپ ساقشىلارى بارىمتاشىلار جايىلىمنان سويىپ الىپ كەتكەن مالداردىڭ زاڭدى يەلەرىن انىقتاۋ جۇمىستارىن دا جۇرگىزۋدە.

قىلمىستىق ءىس اۋداندىق پوليتسەيلەردىڭ وندىرىسىندە. كۇدىكتىلەردىڭ وڭىردەگى بۇعان ۇقساس وزگە دە قىلمىستارعا قاتىستىلىعى تەكسەرىلۋدە. سونىمەن قاتار، پوليتسەيلەر ۇرلانعان مالدى ساتىپ الۋشىنى دا قىلمىستىق جاۋاپكەرشىلىككە تارتۋ ماسەلەسىن قاراستىرۋدا. قازىرگى ۋاقىتتا قىلمىستىق توپ مۇشەلەرى مەكەنجايىن وزگەرتپەۋ تۋرالى مىندەتتەمەمەن بوساتىلدى. ولار مىنگەن كولىك سوتقا دەيىنگى تەرگەۋ امالدارى اياقتالعانعا دەيىن ارنايى تۇراققا توعىتىلدى.

سوڭعى جاڭالىقتار