جەڭىل اتلەتيكادان ەل چەمپيوناتى: 60 مەترگە جۇگىرۋدەن وتىز جىل وزگەرمەگەن رەكورد جاڭاردى

نۇر-سۇلتان. قازاقپارات - وسكەمەن قالاسىندا وتكەن جەڭىل اتلەتيكادان قازاقستان چەمپيوناتىندا قاراعاندى قۇراماسى ءبىرىنشى ورىنعا يە بولدى.

21 جاسار قاراعاندىلىق داۆيد ەفرەموۆ 60 مەترگە جۇگىرۋدە ەلدىڭ رەكوردشىسى اتاندى، دەپ حابارلايدى قازاقپارات ءتىلشىسى.

بۇل ديستانتسيادا وتىز جىل بويى اندرەي گۋتوۆتىڭ رەكوردىن ەشكىم جاڭارتا الماعان بولاتىن. 1992-جىلى جەڭىل اتلەت 7,78 س ىشىندە 60 مەتردى جۇگىرىپ وتكەن.

داۆيد ەفرەموۆ بۇل كورسەتكىشتەن اسىپ ءتۇسىپ، اتالمىش قاشىقتىقتى 7,67 سەكىندتا جۇگىرىپ ءوتتى. قاراعاندىلىق سپورتشى ناۋرىز ايىندا نانكين قالاسىندا (قىتاي) وتەتىن الەم چەمپيوناتىنا نورماتيۆتى ورىندادى. جەرلەسىمىزدى نيكولاي بارسانوۆ جاتتىقتىرادى.

اباي قۇنانبايەۆتىڭ 175 جىلدىعىنا ارنالعان جەڭىل اتلەتيكادان قازاقستاننىڭ XXIX چەمپيوناتى 17-18- قاڭتاردا وسكەمەن قالاسىندا ولگا رىپاكوۆا اتىنداعى سپورت مانەجىندە ءوتتى. جارىسقا ەلىمىزدىڭ بارلىق ايماقتارىنان 260 سپورتشى قاتىستى.

بىرىنشىلىكتە ناتيجەلەردى باعالاۋ ءۇشىن العاش رەت Finish LYNX « اقىلدى» جابدىعىن پايدالاندى. ونىڭ كومەگىمەن سپورتشىلاردىڭ ناقتى قادامداستىرۋ جانە فوتوفينيشى انىقتالدى، ال بارلىق دەرەكتەر اۆتوماتتى تۇردە ەكراندا كورسەتىلىپ وتىردى.

چەمپيوناتتىڭ قورىتىندىسى بويىنشا جالپى كوماندالىق ەسەپتە قاراعاندى وبلىسىنىڭ سپورتشىلارى كوش باستادى. ەكىنشى ورىندى شىعىس قازاقستان وبلىسىنىڭ سپورتشىلارى، ءۇشىنشى ورىندى قوستاناي وبلىسىنىڭ سپورتشىلارى يەلەندى.

قاراعاندى اتلەتتەرى 27 مەدالعا يە بولدى، ونىڭ ىشىندە 8 التىن، 13 كۇمىس، 6 قولا.

چەمپيوناتتىڭ جەڭىمپازدارى مەن جۇلدەگەرلەرى جەڭىل اتلەتيكادان الەم جارىستارىندا ەل نامىسىن قورعايتىن بولادى. ۇزدىك اتلەتتەر 12-13- اقپاندا قىتايدا وتەتىن ازيا چەمپيوناتىنا جولداما الدى.