تۇرىكتەر 60 جىل بويى ارمانداعان كولىكتەرىن شىعاردى - فوتو
تۇركيا 1960 -جىلدارى «Devrіm» دەپ اتالاتىن ءوز وتاندىق كولىگىن جاساماقشى بولعان، ءبىراق جوبا اياقسىز قالعان ەدى. بۇگىندە سول ارمان ورىندالدى.
«TOGG» دەپ اتالاتىن كولىك تۇركيانىڭ سولتۇستىك- باتىسىنداعى گەبزە وڭىرىندە شىعارىلادى. سىناق رەتىندە شىعارعان كولىكتى تەكسەرىپ، جۇرگىزىپ كورگەن ەل پرەزيدەنتى رەدجەپ تايىپ ەردوعان ولاردىڭ الداعى 2022 - جىلدان باستاپ ساتىلىمعا شىعاتىنىن مالىمدەدى.
بۇل كولىكتەردى بەس بىرىككەن تۇرىك كاسىپورنى شىعارادى. تۇركيا ب ا ق وكىلدەرىنىڭ حابارلاۋىنشا، تەمىر تۇلپارلار ديزاينىن «پينين فارينا» دەپ اتالاتىن اتاقتى «فەرراري» كولىكتەرىن جوبالاعان كومپانيا جاساعان.
«تۇرىك حالقىنىڭ ءوز وتاندىق كولىگىن شىعارۋدى كوزدەگەن 60 جىلدىق ارمانى بۇگىن ورىندالدى. بۇل كولىكتەردى جاسايتىن زاۋىت بۋرسا ايماعىنان سالىنادى. 2021 -جىلعا قاراي قۇرىلىس جۇمىسى اياقتالىپ، اۆتوكولىكتەر 2022 -جىلدان باستاپ ساتىلىمعا شىعادى. بۇل كاسىپورىن 4300 ادامدى جۇمىسپەن قامتيدى. كەلەسى 15 جىلدا ءبىز وسىنداي 5 ءتۇرلى كولىك شىعاراتىن بولامىز»، - دەيدى تۇركيا پرەزيدەنتى.
تاراعان مالىمەتكە سايكەس، اۆتوكولىكتەر «G4» جانە «G5» تەحنولوگيالارىمەن جابدىقتالادى. كەپتەلىستە ۇزاق تۇرعاندا، ۇيىقتاپ الۋعا دا بولادى. سەبەبى كولىكتىڭ ءوزى جۇرەتىن قابىلەتى بار. ول وزدىگىنەن باياۋ ءجۇرىپ جانە توقتاي الادى.
ايتا كەتەيىك، ىشكى ىستەر مينيسترلىگى اۆتوكولىكتەرى شەت مەملەكەتتەردە تىركەلگەن قازاقستاندىقتاردى ەلىمىزدىڭ زاڭناماسىنا سايكەس كولىك قۇرالدارىن تىركەۋگە شاقىرعانىن حابارلاعان ەدىك.