ورالدا ەر ادام ايەلىمەن اجىراسقانىن 60 دجيپ كولىگىن جالداپ، اتاپ وتكەن

ورال. قازاقپارات - ورالدا ەر ادام ايەلىمەن اجىراسقانىن كورتەج جالداپ، اتاپ وتكەن، دەپ حابارلايدى قازاقپارات ءتىلشىسى.

باتىس قازاقستان وبلىسىندا پوليتسيا دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، 16 - قاراشا كۇنى ساعات 11.06-دا 102 تەلەفونىنا «سامال-1» شاعىناۋدانىنداعى «اراسان» مونشاسى جانىندا توبەلەس بولىپ جاتقانى جونىندە حابار تۇسكەن.

پوليتسيا قىزمەتكەرلەرى وقيعا بولعان جەردە 20-دان استام ءتۇرلى ماركاداعى جول تالعامايتىن اۆتوكولىكتىڭ تۇرعانىن انىقتاعان.

كوپ ۇزاماي اتالعان كورتەجدى شىعىس قازاقستان وبلىسىنىڭ 34 جاسار س. ەسىمدى ازاماتى ۇيىمداستىرعانى بەلگىلى بولدى.

ونىڭ سوزىنە قاراعاندا، 11- قاراشا كۇنى ول ورال قالاسىندا تۇراتىن بۇرىنعى زايىبىنا كەلگەن. بۇعان دەيىن ولار اجىراسىپ، ءوز يەلىكتەرىندەگى پاتەرىن ساتىپ، ونىڭ قارجىسىن ءبولىپ العان. وسى قارجىدان اتالعان ازامات العاشقى كۇنى 5 اۆتوكولىك جالداپ جۇرگەن. ودان كەيىنگى كۇندەرى 20-عا دەيىن جەتكىزگەن. بارلىعى 60 دجيپكە تاپسىرىس بەرگەن. ءوزىنىڭ ايەلىمەن اجىراسقانىن وسىلايشا اتاپ وتپەك بولعان.

جيىرما شاقتى اۆتوكولىك ءمان- جايدى انىقتاۋ ءۇشىن ورال قالاسى پوليتسيا باسقارماسىنا جەتكىزىلىپ، بارلىعى دەرلىك جىبەرىلدى. تەك «LINKOLN» اۆتوكولىگى ارنايى تۇراققا قويىلىپ، ءتيىستى قۇجاتتارىنسىز ايداعانى ءۇشىن جۇرگىزۋشىسىنە اكىمشىلىك حاتتاما تولتىرىلدى.

ەسكە سالا كەتەيىك، بۇدان بۇرىن ورالدا ەر ادام 60 دجيپ كولىگىن جالداپ، سەرۋەندەگەنىن جازعان بولاتىنبىز.

اۆتور ەلجان ەرالى