ديماش لوندونداعى كونسەرتتە اندەرىنىڭ 60 پايىزىن قازاق تىلىندە شىرقايدى

 استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى قانات ايتبايەۆپەن جانە ديماش قۇدايبەرگەنمەن كەزدەسىپ، 19 -قاراشادا وتەتىن كونسەرتتىڭ جايىن تالقىلادى، دەپ حابارلايدى قازاقپارات ءتىلشىسى.

«استانالىق «تەررا بالەت» توبى، سونىمەن قاتار ۇلت- اسپاپتار انسامبلىندە كەرەمەت ونەر كورسەتىپ جۇرگەن ۇل- قىزدار بارىپ، ءبىزدىڭ قازاقتىڭ اندەرىنە ۇلتتىق رەڭك پەن ءوڭ بەرە وتىرىپ، سۇيەمەل جاسايدى. وسى كونسەرتتىڭ ۇيىمداستىرىلۋىنا قىز-جىگىتتەر اتسالىسىپ، كومەكتەسىپ جاتىر. اماندىق بولسا، ناتيجەسىن كورەسىزدەر. ورىندالاتىن اندەردىڭ 60 پايىزى قازاق تىلىندە بولادى»، - دەدى قانات ايتبايەۆ.

 

ءوز كەزەگىندە ديماش قۇدايبەرگەن لوندوندا جاندى داۋىستا، وركەسترمەن وتىزعا جۋىق ءان ايتاتىنىن حابارلادى.

ايتا كەتسەك، وسى ايدىڭ 19 ىندا لوندوندا ديماشتىڭ جەكە كونسەرتى وتەدى. قازىرگى تاڭدا لوندون ورتالىعىنداعى ەكرانداردا قازاقستاندىق ءانشىنىڭ كونسەرتى جارنامالانىپ جاتىر.