بيىلعى بەس ايدا 600-دەن استام لاۋازىمدى تۇلعانىڭ جەمقورلىق ارەكەتى اشكەرەلەندى
24 مامىر 13:09

بيىلعى بەس ايدا 600-دەن استام لاۋازىمدى تۇلعانىڭ جەمقورلىق ارەكەتى اشكەرەلەندى

نۇر-سۇلتان. قازاقپارات - مەملەكەت باسشىسى سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى ولجاس بەكتەنوۆتى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قاسىم-جومارت توقايەۆقا ەلىمىزدەگى سىبايلاس جەمقورلىققا قارسى ءىس-قيمىلعا قاتىستى قابىلدانىپ جاتقان شارالار جونىندە ەسەپ بەرىلدى. اگەنتتىكتىڭ دەرەگى بويىنشا بيىلعى 5 ايدىڭ ىشىندە سىبايلاس جەمقورلىققا قاتىستى 1000-نان استام قىلمىستىق ءىس تىركەلگەن. 600-دەن استام لاۋازىمدى تۇلعانىڭ جەمقورلىق ارەكەتى اشكەرەلەنگەن. ولاردىڭ 110 ى - ءارتۇرلى دەڭگەيدەگى باسشىلار.

ولجاس بەكتەنوۆ مەملەكەتكە كەلتىرىلگەن زالالدىڭ وتەلۋىن قامتاماسىز ەتۋ جونىندەگى پرەزيدەنت تاپسىرماسىنىڭ ورىندالۋ بارىسى تۋرالى مالىمەت بەردى. جىل باسىنان بەرى ەل بيۋدجەتىنە 220 ميلليارد تەڭگەدەن استام قارجى قايتارىلدى.

مەملەكەت باسشىسىنا اگەنتتىكتىڭ بيزنەسكە زاڭسىز ارالاسۋدان قورعاۋ تەتىكتەرىن قالىپتاستىرۋ ءۇشىن شارالار قابىلداعانى جونىندە باياندالدى. ءىس-قيمىل الگوريتمى ازىرلەنگەن. سوعان سايكەس تەرگەپ- تەكسەرۋدىڭ باستالۋى مەن كاسىپكەرلەرگە قاتىستى كەز- كەلگەن تەرگەۋ امالدارى ورتالىق اپپاراتتىڭ كەلىسىمى ارقىلى جۇزەگە اسىرىلۋعا ءتيىس.

سونىمەن قاتار «اتامەكەن» ۇلتتىق كاسىپكەرلەر پالاتاسىمەن بىرلەسىپ، مەملەكەتتىك ورگانداردىڭ بيزنەسكە زاڭسىز ارالاسۋ فاكتىلەرىنە جەدەل نازار اۋداراتىن جۇمىس توبى قۇرىلدى. كەزدەسۋ سوڭىندا قاسىم-جومارت توقايەۆ سىبايلاس جەمقورلىققا قارسى جۇمىستاردى كۇشەيتۋ جونىندە ءبىرقاتار ناقتى تاپسىرما بەردى.

جاڭالىقتار