ەكىنشى دۇنيەجۇزىلىك سوعىستا حابار-وشارسىز كەتكەن 600 جاۋىنگەر تابىلدى
بۇل تۋرالى «Atamnyn amanaty» قوعامدىق قورىنىڭ باسقارما ءتوراعاسى مۇرات مولداعاليەۆ ايتتى، دەپ حابارلايدى قازاقپارات ءتىلشىسى.
«قازاقستان جەرىنەن سوعىسقا 1,5 ميلليوننان استام جاۋىنگەر مەن وفيتسەر مايدانعا اتتانسا، سونىڭ 271 مىڭى ءىز-ءتۇزسىز جوعالعاندار ساناتىنا جاتادى. كەز كەلگەن جاۋىنگەر ءۇشىن كومۋسىز قالۋ جانە ءىز-ءتۇزسىز جوعالعاندار تىزىمىنە ەنۋ ۇلكەن قاسىرەت سانالاتىن شىعار. سوندىقتان دا ءبىزدىڭ بىرلەستىك وسى ەسىمدەردى ۇرپاقتارىنىڭ جادىنا ورالتۋ ماقساتىندا قۇرىلعان ەدى»، - دەدى ول ونلاين باسپا ءسوز ءماسليحاتى بارىسىندا.
ونىڭ اتاپ وتۋىنشە، ول ءۇشىن ارناۋلى سايت قۇرىلعان جانە وعان سوعىسقا اتتانىپ ءىز-ءتۇزسىز جوعالعان جاقىندارىن ىزدەگەن كەز كەلگەن ادام جۇگىنە الادى.
«بيىل 3 مىڭنان استام ءوتىنىم تۇسكەن ەدى. ونىڭ ىشىندە 600 ءوتىنىمدى ورىنداپ، ۇرپاقتارىنا 600 جاۋىنگەردىڭ ەسىمىن قايتارا الدىق»، - دەدى مۇرات مولداعاليەۆ.
اۆتور: مارلان جيەمباي