ماڭعىستاۋدا 600 دۋاداق ەركىندىككە جىبەرىلدى
قۇستاردىڭ كوبى بىرىككەن اراب امىرلىگىندە وسىرىلگەن بولسا، كەيبىرەۋلەرى تۇركىستانداعى تۇقىمباقتان اكەلىنگەن، دەپ حابارلايدى قازاقپارات ءتىلشىسى.
شارا ماقساتى - جويىلىپ بارا جاتقان، سيرەك كەزدەسەتىن، قىزىل كىتاپقا ەنگىزىلگەن دۋاداقتىڭ پوپۋلياتسياسىن ساقتاۋ جانە قالپىنا كەلتىرۋ.
جوبا ۇيىمداستىرۋشىلارىنىڭ ايتۋىنشا، قازاق دالاسىنا 2009 -جىلدان بەرى جىل سايىن ءابۋ- دابي قالاسىندا وسىرىلگەن قۇستار جىبەرىلەدى. وبلىس اۋماعىندا ۇشىرىلعان قۇستاردىڭ بارلىعىنا ارنايى بەلگى تاعىلىپ، GPS قوندىرعىلار ورناتىلعان. وسى قۇرىلعىلاردىڭ ارقاسىندا قورىقشىلارى مەن عالىمدار قۇستىڭ ۇشىپ كەتەتىن باعىتىن جانە ولاردىڭ قاي جەردە كوبەيەتىنىن زەرتتەيتىن بولادى. ادام قولىندا وسكەن دالا قۇسى ماڭعىستاۋ تابيعاتىنا دا تەز ءسىڭىسىپ، قىسقا دەيىن جىلى جاققا ۇشىپ كەتەدى.
«بىزدەر الدىمەن، ماڭعىستاۋ ءوڭىرىنىڭ تابيعاتىمەن تانىسىپ، ءوڭىردىڭ ەكولوگيالىق جاعىندا ەسكەردىك. بۇدان بولەك اۋا- رايىن دا باقىلىپ كوردىك. سودان سوڭ ماڭعىستاۋ دالاسى دۋاداق قۇستارىنا ناعىز قولايلى مەكەن ەكەنىن ءبىلىپ، 20-30 نۇكتەگە قازىق قاعىپ، بەلگىلەدىك. قازىر ءبىز سول العاشقى نۇكتەلەردىڭ بىرىندەمىز. بۇل جەرلەر دۋاداق قۇسىنا تاپتىرماس ءوڭىر ەكەن. بىزدەر قۇستاردى جىبەرىپ قانا قويماي، ولاردى 10-15 كۇندەي باقىلاپ، قاراپ جۇرەتىن بولامىز. ولاردىڭ وسى جەرلەرگە جەرسىنىپ كەتۋىنە مۇمكىنشىلىك جاسايمىز» ، - دەيدى قۇس مامانى ەريك لە نۋز.
جالپى مامانداردىڭ بولجامى بويىنشا، وڭىردە شامامەن 1-1,5 مىڭ دۋاداق مەكەن ەتۋگە مۇمكىندىك بار.
«وسى جەردە ءساۋىر، مامىر ايلارىندا جۇمىرتقالايدى. بالاپاندارىن ورگىزەدى. سوسىن كۇزگە دەيىن ماڭعىستاۋ اۋماعىندا بولادى. قازان، قاراشا ايلارىندا العاشقى سۋىق تۇسكەن كەزدە، ەكى- ءۇش كۇندە ءبىر جينالىپ، جىلى جاققا ۇشىپ كەتەدى. كۇن جىلىعان ۋاقىتتاك كوكتەمدە ماڭعىستاۋعا ۇشىپ كەلەدى» ، - دەيدى ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى عابباس دوساتوۆ.
شارانىڭ قارجىلاندىرۋدى بىرىككەن اراب امىرلىكتەرى جانە ق ر اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار الەمى كوميتەتىمەن بىرلەسە جۇزەگە اسىرادى.