ەلباسى ايتقان 600 ميلليارد تەڭگەنىڭ جەڭىل نەسيەلەرى قاي سالاعا بەرىلەدى

None
None
استانا. قازاقپارات - «اتامەكەن» ۇلتتىق كاسىپكەرلەر پالاتاسى سوڭعى جولداۋ اياسىندا بولىنەتىن قىرۋار قارجىعا قانداي سالالاردى كوتەرۋگە بولاتىنىن جاريالادى.

ول قاراجاتقا حالىق كوپ تۇتىناتىن تاۋارلاردى شىعارۋ قاجەت، دەپ حابارلايدى قازاقپارات ءتىلشىسى.

پالاتا ءتوراعاسى ابىلاي مىرزاحمەتوۆتىڭ ايتۋىنشا، بۇگىندە ىشكى نارىققا قاجەتتى ونىمدەردى شىعارا الاتىن كاسىپورىندار بار. ءبىراق ولاردىڭ باسىم بولىگى تولىققاندى جۇمىس ىستەپ جاتقان جوق. سەبەبى تاپسىرىس از. وعان قوسا، ءوزىمىز شىعىرا الاتىن تاۋارلاردىڭ ءبىرازى شەتەلدەن تاسىمالدانادى. بانكتەردەن نەسيە الۋ دا وڭاي ەمەس.

«اشىعىن ايتۋ كەرەك، بۇگىندە ورتا جانە شاعىن بيزنەس ءۇشىن نەسيە الۋ ماسەلەسى قيىنعا سوعىپ وتىر. 18-19 پروتسەنتتىك نەسيەمەن ءوندىرىستى كوتەرۋ قيىن. ەلباسى 600 ميلليارد تەڭگەنى ءبولىپ بەرۋدى تاپسىردى. ول قارجى بارىنە جاپپاي بەرىلمەيدى، تەك حالىق تۇتىناتىن تاۋارلاردى شىعاراتىن كاسىپورىندارعا عانا بەرىلەدى. ۇكىمەت باقىلايدى. ءبىز دە وسى سالاداعى كاسىپورىنداردىڭ ءتىزىمىن ۇسىنۋعا دايىنبىز. پرەزيدەنت شيكىزاتتىق ەمەس سەكتوردا حالىق كوپ تۇتىناتىن تاماق، كيىم- كەشەك، اياق كيىم، جيھاز جانە تاعى باسقا تاۋارلار وزىمىزدە جاسالاۋى قاجەت دەپ ناقتى تاپسىرما بەردى. سونىڭ بارلىعى تەڭگەمەن شىعارىلادى. سوندىقتان حالىققا دا ءتيىمدى بولادى. ال شەتەلدەن كەلەتىن تاۋارلاردىڭ باعاسى، كوپ جاعدايدا، ۆاليۋتانىڭ باعامىنا بايلانىستى بولىپ جاتادى. نەگىزى، بارلىق تاۋارلار وزىمىزدە شىعارىلسا، وتاندىق كاسىپورىندار تاپسىرىس الادى، بيۋدجەتكە سالىق تولەنەدى، جەرگىلىكتى حالىققا دا جۇمىس تابىلادى»، - دەدى ا. مىرزاحمەتوۆ.

ونىڭ سوزىنە قاراعاندا، ەلىمىزدە شيكىزاتتىق ەمەس سەكتورعا جاتاتىن نەگىزگى 8 سالا بار. سونىڭ ىشىندە تاماق، كيىم- كەشەك، جيھاز، ءدارى-دارمەك، ماشينا جوندەۋ، قۇرىلىس ماتەريالدارى بار.

«ءبىز جىل باسىنان بەرى پاسپورتتاۋ شارالارىن اتقارىپ شىقتىق. اتالعان كاسىپورىندار 55 پروتسەنتكە عانا جۇمىس ىستەپ تۇر. دەمەك، ولارعا مەملەكەت تاراپىنان، تۇتىنۋشىلاردان جاڭا تاپسىرىستار قاجەت»، - دەپ اتاپ كورسەتتى ا. مىرزاحمەتوۆ.

ايتا كەتەيىك، ق ر پرەزيدەنتى نۇرسۇلتان نازاربايەۆ حالىققا ارناعان سوڭعى جولداۋىندا ىشكى نارىقتى وتاندىق تاۋارلارمەن تولتىرۋدى تاپسىردى. وسىعان بايلانىستى ۇكىمەت وڭدەۋ ونەركاسىبى مەن شيكىزاتتىق ەمەس ەكسپورتتى قولداۋ ماقساتىندا الداعى 3 جىلدا قوسىمشا 500 ميلليارد تەڭگە ءبولىپ بەرەدى. ال ۇلتتىق بانك باسىمدى جوبالارعا قولجەتىمدى نەسيە بەرۋ ءۇشىن كەمىندە 600 ميلليارد تەڭگە كولەمىندە ۇزاق مەرزىمگە قارجى بەرەدى.

«حالىق تۇتىناتىن تاۋارلاردىڭ اۋقىمدى نومەنكلاتۋراسىن يگەرىپ، «قاراپايىم زاتتار ەكونوميكاسىن» دامىتۋ ءۇشىن كاسىپورىندارىمىزعا كومەكتەسۋ كەرەك. بۇل ەكسپورتتىق الەۋەتىمىزدى جۇزەگە اسىرۋ تۇرعىسىنان عانا ەمەس، سونداي-اق ىشكى نارىقتى وتاندىق تاۋارلارمەن تولتىرۋ ءۇشىن دە ماڭىزدى»، - دەپ اتاپ كورسەتتى پرەزيدەنت.

سوڭعى جاڭالىقتار