قىرعىزستاندا وتەتىن كوشپەندىلەر ويىندارىندا 600 مەدال ساراپقا سالىنادى
ءبىزدىڭ دەلەگاتسيا ەڭ اۋقىمدى قۇرامالاردىڭ قاتارىندا. بۇگىندە كورشىلەس ەلدە حالىقارالىق جارىسقا ارنالعان دايىندىق جۇمىستارىنىڭ سوڭعى كەزەڭى جۇرگىزىلىپ جاتىر.
بىشكەكتەن دۇنيەجۇزىلىك كوشپەندىلەر ويىندارى وتەتىن چولپان اتا قالاسىنا دەيىن اپاراتىن ءبىر عانا جول بار. وندا قازىر قۇرىلىس جۇمىستارى اياقتالۋعا جاقىن. ەندى بۇل جول ءتورت جولاقتى ۇلكەن اۆتوماگيسترالعا اينالدى. «جولدىڭ ەكىنشى قاباتىن توسەپ ۇلگەرمەيمىز. ويتكەنى بۇل - ۇلكەن جوبا. جولدىڭ ۇزىندىعى - 104 شاقىرىم»، - دەيدى اۆتوموبيل جولدارى دەپارتامەنتىنىڭ ديرەكتورى شابدانبەك يمانقۇلوۆ.
كوشپەندىلەر ويىندارى وتەتىن باستى نىسان - چولپان اتا يپپودرومى. كەشەن وسىدان ەكى جىل بۇرىن قايتا جوندەۋدەن ءوتىپ، قىرعىز حالقىنىڭ ۇلتتىق ناقىشىنا ساي جاساقتالعان. «كوك- بورۋ الاڭىنداعى قۇمنىڭ ءبىر قاباتىن الىپ تاستاۋدى جوسپارلاپ وتىرمىز. سەبەبى اتتار شاپقان كەزدە ءبىرقالىپتى مانەردى جوعالتىپ الادى. سول سەبەپتى جارىس باستالعانشا الاڭدى دايىنداپ قويماقپىز»، - دەيدى يپپودروم ديرەكتورى ەلامان مامىتوۆ.
ءدۇبىرلى دوداعا قاتىسۋ ءۇشىن 53 ەلدەن ءوتىنىش كەلىپ تۇسكەن. سپورتشىلاردىڭ باسىم بولىگى رەسەي جانە قازاقستاننان كەلەدى. جارىستا بارلىعى 600 مەدال ساراپقا سالىنادى. جالپى جۇلدە قورى 260 ميلليون سومدى، ياعني 400 مىڭ دوللاردى قۇرايدى. سپورتتىق شارا اياسىندا كوشپەندى حالىقتاردىڭ تاريحى، مادەنيەتى جانە سالت- ءداستۇرىن كورسەتۋ جوسپارلانىپ وتىر.
فوتو: ria.ru