نۇر- سۇلتاندا از قامتىلعان وتباسىلارعا 600 پاتەر ساتىپ الۋعا 5,1 ميلليارد تەڭگە ءبولىندى
بۇل تۋرالى بۇگىن نۇر- سۇلتان قالالىق ستراتەگيالىق جانە بيۋدجەتتىك جوسپارلاۋ باسقارماسى باسشىسىنىڭ مىندەتىن اتقارۋشى ايجان تۇگەلبايەۆا ايتتى، دەپ حابارلايدى قازاقپارات ءتىلشىسى.
«رەسپۋبليكالىق بيۋدجەتتى ناقتىلاۋ بارىسىندا نۇر- سۇلتان قالاسىنا 30 ميلليارد 768 ميلليون تەڭگە ترانسفەرت قاراستىرىلعان. ونىڭ 16 ميلليارد 95,8 ميلليون تەڭگەسى ينۆەستيتسيالىق جوبالاردى جۇزەگە اسىرۋعا قاراستىرىلىپ وتىر»، - دەدى ول.
ايجان تۇگەلبايەۆانىڭ اتاپ وتۋىنشە، ەڭبەك جانە حالىقتى الەۋمەتتىك قورعاۋ مينيسترلىگى تاراپىنان اتاۋلى الەۋمەتتىك كومەك كولەمى ارتتىرىلعان.
«بۇل ماقساتقا 942,6 ميلليون تەڭگە سوماسىندا اعىمدىق ترانسفەرت ءبولىندى. بيۋدجەت سالاسىنىڭ تومەن جالاقى الاتىن قىزمەتكەرلەرىنىڭ ايلىعىن 30 پايىزعا كوتەرۋگە 4,4 ميلليارد تەڭگە سوماسىندا اعىمدىق ترانسفەرت كوزدەلىپ وتىر. حالىقتىڭ از قامتىلعان توبىنا 50 شارشى مەتردەن كەم ەمەس 616 پاتەر ساتىپ الۋعا 5,1 ميلليارد تەڭگە ءبولىندى. جەر ۋچاسكەلەرىن مەملەكەت قاجەتتىلىگىنە الۋعا 3,8 ميلليارد تەڭگە قاراستىرىلعان»، - دەدى باسقارما باسشىسىنىڭ مىندەتىن اتقارۋشى.
سونىمەن قاتار ا. تۇگەلبايەۆا قالا بيۋدجەتىنىڭ جەكەلەگەن باعدارلامالارىنا كوزدەلگەن قاراجاتتاردىڭ وڭتايلاندىرىلعاندىعىن دا ايتتى.
«جەكەلەگەن بيۋدجەتتىك باعدارلامالار بويىنشا 10 ميلليارد 956 ميلليون تەڭگە وڭتايلاندىرىلدى. اتالعان قاراجاتتى ءبىرقاتار شۇعىل مىندەتتەردى شەشۋگە باعىتتاۋ كوزدەلىپ وتىر»، - دەدى ول.
اۆتور: مارلان جيەمباي