تۇركىستان وبلىسىندا ءىرى قارا مال باسى 6,7 پايىزعا ارتتى

تۇركىستان. قازاقپارات - قازاقستاندا سالىنعان جىلى جايلاردىڭ 77 پايىزى جانە تامشىلاتىپ سۋارۋ ءادىسىنىڭ 73 پايىزى تۇركىستان وبلىسىنا تيەسىلى.

وڭىردە جىلىجاي كولەمىن ارتتىرۋ ءۇشىن قوسىمشا 86,7 گەكتار جىلىجاي سالىنىپ، وبلىستاعى جالپى كولەمى 1287,7 گەكتارعا جەتتى. بۇل تۋرالى بۇگىن تۇركىستان وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە اۋىل شارۋاشىلىعى باسقارماسىنىڭ باسشىسى سەرىك تۇربەكوۆ ءمالىم ەتتى.

سونىمەن قاتار، تامشىلاتىپ سۋارۋ ءادىسى جاڭادان 6223 گەكتار اۋماققا ەندىرىلىپ، جالپى كولەمى 64,2 مىڭ گەكتارعا جەتتى.

«وبلىس بويىنشا ءداندى داقىلداردىڭ بارلىق ەگىس كولەمى 280,9 مىڭ گەكتاردى قۇراپ، مەجەدەن 35,9 مىڭ گەكتارعا ارتتى. ال ماقتانىڭ ەگىس كولەمى 129,7 مىڭ گەكتارعا جەتىپ، جوسپاردان 24,7 مىڭ گەكتارعا ءوسىپ وتىر. بۇگىنگى تاڭدا وبلىستاعى بارلىق باۋ كولەمى - 21600 گەكتار، ونىڭ ىشىندە ينتەنسيۆتى باۋلار - 2 800 گەكتار، ءجۇزىم - 10200 گەكتار، تاڭقۋراي - 208 گەكتار، جاڭعاق شارۋاشىلىعى - 350 گەكتاردى قۇرايدى. اعىمداعى جىلى قوسىمشا ينتەنسيۆتى باۋلار - 940 گەكتار، ءجۇزىم - 570 گەكتار، جاڭعاق 207 گەكتار القاپقا قوسىمشا ەگىلدى»، - دەدى سەرىك تۇربەكوۆ.

2018-جىلدىڭ 6 ايىنىڭ قورىتىندىسى بويىنشا وڭىردەگى ءىرى قارا مالدىڭ سانى - 6,7 پايىزعا، قوي مەن ەشكى سانى - 5,2 پايىزعا، جىلقى باسى - 9,6 پايىزعا، تۇيە - 6,7 پايىزعا، قۇس سانى - 13,8 پايىزعا ارتقان. سونداي-اق، وبلىستا ەسەپتى كەزەڭدە 103,4 مىڭ توننا ەت، 364,4 مىڭ توننا ءسۇت، 95,1 ميلليون دانا جۇمىرتقا وندىرىلگەن.

«التىن اسىق» باعدارلاماسىمەن 11893 باس قوي ساتىپ الىنىپ، جالپى انالىق باسقا شاققانداعى ۇلەسى 5,1 پايىزدى قۇراعان. «قۇلان» باعدارلاماسى اياسىندا 2059 باس جىلقى الىنىپ وتىر.