6,5 ميلليون توننا استىقتى ەكسپورتقا شىعارۋعا مۇمكىندىگىمىز بار - اسقار مامين

نۇر- سۇلتان. قازاقپارات - ەلىمىزدە ەگىن جيناۋ جۇمىستارى 95 پايىزعا جۋىق ورىندالدى. بۇل تۋرالى ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«الەمدەگى بيداي جيناۋ بويىنشا جاعداي كۇردەلى بولىپ وتىر. وزدەرىڭىزگە ءمالىم، اۋا رايىنىڭ قولايسىز بولۋى - استىق شىعىمىنىڭ تومەندەۋىنە ىقپال ەتتى. قازاقستاندا ءداندى داقىلدار مەن مايلى داقىلداردى جالپى جيناۋدى 18 ميلليون تونناعا، سونىڭ ىشىندە ءداندى جانە ءداندى- بۇرشاقتى داقىلداردى 16 ميلليون تونناعا دەيىن جەتكىزۋ جوسپارلانىپ وتىر»، - دەدى ۇكىمەت باسشىسى. ونىڭ اتاپ وتۋىنشە، بۇگىنگى كۇنى ەگىن جيناۋ جۇمىستارى 95 پايىزعا جۋىق ورىندالدى.

«بيىلعى قۇرعاقشىلىقتىڭ سالدارىنان بيداي كولەمى ازايسا دا، ەلىمىزدەگى بيدايعا دەگەن ىشكى قاجەتتىلىك تولىق قامتاماسىز ەتىلدى. 6-6,5 ميلليون تونناعا جۋىق بيدايدى ەكسپورتقا شىعارۋعا مۇمكىندىگىمىز بار»، - دەدى اسقار مامين.