تەننيس: ۋيمبلدونداعى ماتچ 6 ساعات 36 مينۋتقا سوزىلدى

None
None
استانا. قازاقپارات - ۋيمبلدون تۋرنيرىنىڭ جارتىلاي فينالىندا وڭتۇستىك افريكالىق كيەۆين اندەرسون مەن امەريكالىق دجون يسنەر اراسىنداعى ماتچ اسا تارتىستى ءوتتى، دەپ حابارلايدى قازاقپارات ءتىلشىسى.

كەزدەسۋ 6 ساعات 36 مينۋتقا سوزىلىپ، وندا الەمنىڭ 8-راكەتكاسى ك. اندەرسون وزىنەن ەكى-اق ساتى تومەن تۇرعان د. يسنەردى 7:6 (8:6)، 6:7 (5:7)، 6:7 (9:11)، 6:4, 26:24 ەسەبىمەن جەڭدى.

ۋيمبلدوندا سوڭعى پارتيادا تاي-برەيك وينالمايتىنى بەلگىلى. سوندىقتان تەننيسشىلەردىڭ بىرەۋى برەيك جاساپ، ءوزىنىڭ گەيمىن العانشا، ويىن جالعاسا بەرەدى. ەسەپ 24:24 بولىپ تۇرعان مەزەتتە د. يسنەر قارسىلاسىنىڭ برەيك جاساۋىنا مۇمكىندىك بەرىپ قويدى. ك. اندەرسون سوسىن ءوزىنىڭ گەيمىن جەڭىسپەن اياقتادى.

وسىلايشا بۇل ماتچ ۇزاقتىعى جونىنەن ۋيمبلدون تاريحىنداعى ەكىنشى كەزدەسۋ بولىپ تىركەلدى. 2010-جىلى ۋيمبلدون تۋرنيرىنىڭ العاشقى اينالىمىندا وسى د. يسنەر مەن فرانسۋز نيكوليا مايۋ ايدى اسپانعا شىعارىپ، ءۇش كۇن بويى ءبىر-بىرىنە جەڭىستىك بەرمەگەن ەدى. وندا 11 ساعات 5 مينۋتقا سوزىلعان باسەكەدە د. يسنەر سوڭعى پارتيادا 70:68 ەسەبىمەن جەڭىسكە جەتكەن ەدى. كەيىن تەننيس تاريحىندا ەڭ ۇزاق كەزدەسۋ بولعان تاريحي ماتچ وتكەن 18-كورت قابىرعاسىندا ەسكەرتكىش تاقتا ورناتىلدى.

بۇل جولى اندەرسون مەن يسنەر اراسىنداعى جەكپە-جەك 11 ساعاتقا جەتە الماعانىمەن، شەشۋشى باسەكەلەردە (جارتىلاي فينال مەن فينال) وينالعان گەيمدەر سانى جونىنەن بۇرىنعى ناتيجەدەن اسىپ ءتۇستى. ياعني، 2009-جىلعى ۋيمبلدون تۋرنيرىنىڭ فينالىندا شۆەيتساريالىق رودجەر فەدەرەر مەن امەريكالىق ەندي رودديك 77 گەيممەن توقتاسا، اندەرسون مەن يسنەر 99 عا ءبىر-اق جەتكىزدى.

سونىمەن قاتار د. يسنەر ۋيمبلدون تۋرنيرلەرىندەگى ەيس سانى جونىنەن رەكوردتىق ناتيجە كورسەتتى. بۇعان دەيىن حورۆاتيالىق گوران يۆانيشيەۆيچ 2001-جىلعى ۋيمبلدون تۋرنيرىندە 212 ەيس جاساسا، يسنەر بۇل كورسەتكىشتەن اسىپ ءتۇستى.

ايتا كەتەيىك، ك. اندەرسون ۋيمبلدون تۋرنيرىنىڭ فينالىندا دۇنيەجۇزىلىك رەيتينگتە كوش باستاپ تۇرعان يسپانيالىق رافاەل نادال نەمەسە وسى جارىستىڭ 12-راكەتكاسى بولىپ تىركەلگەن سەربيالىق نوۆاك دجوكوۆيچتىڭ بىرەۋىمەن شەبەرلىك بايقاسادى.

ۋيمبلدونعا ەرلەر اراسىندا قازاقستاننان جالعىز قاتىسقان ميحايل كۋكۋشكين ەكىنشى اينالىمدا ر. نادالعا جول بەرگەن بولاتىن.

سوڭعى جاڭالىقتار