الداعى 5 جىلدا ماشينا جاساۋ سالاسىندا قانداي ماماندار سۇرانىستا بولادى
«ماشينا جاساۋ سالاسىندا كاسىبي ءبىلىمى بار بىلىكتى كادرلاردىڭ جەتىسپەۋشىلىگى بايقالادى. ۇلتتىق بولجامعا سايكەس، ورتا مەرزىمدى كەزەڭدە (2024-2028-جىلدار ارالىعى) جالپى قاجەتتىلىك 7 مىڭ ماماندى قۇرايدى. الداعى 5 جىلدا ەڭ كوپ سۇرانىسقا يە ماماندىقتار: دانەكەرلەۋشى، ونەركاسىپتىك جابدىقتاردىڭ سلەسارلارى، ينجەنەر-مەحانيك، مەتال بۇيىمدارىن وڭدەۋ جونىندەگى وپەراتور، ونەركاسىپتىك روبوتوتەحنيكانىڭ ينجەنەر-كونسترۋكتورى، ۆيرتۋالدى پروتوتيپتەۋ جونىندەگى مامان، بولجامدى دياگنوستيكا مامانى»، - دەپ تاپشى ماماندىقتاردىڭ ءتىزىمى كەلتىرىلگەن كەشەندى جوسپاردا.
يندۋستريا جانە ينفروقۇرىلىمدىق دامۋ مينيسترلىگىنىڭ اقپاراتىنا قاراعاندا، اتالعان سالا بويىنشا كاسىبي كادرلاردى دايارلاۋعا مىنا ماسەلەلەر كەدەرگى بولىپ وتىر:
- ۇزاق مەرزىمدى كەزەڭگە كادرلىق قاجەتتىلىككە بولجامدى زەرتتەۋلەر جۇرگىزۋ ءۇشىن جەتىلمەگەن ادىستەمەلىك بازا؛
- جۇمىس بەرۋشىلەردى كادرلاردى دايارلاۋعا جانە قايتا دايارلاۋعا تارتۋ جونىندەگى زاڭنامالىق بازانىڭ جەتكىلىكسىزدىگى؛
- تەحنيكالىق جانە كاسىپتىك ءبىلىم بەرەتىن وقۋ ورىندارىنىڭ (ت ج ك ب) ەسكىرگەن ماتەريالدىق-تەحنيكالىق بازاسى؛
- دۋالدى ءبىلىم بەرۋ، ت ج ك ب تۇلەكتەرىن سەرتيفيكاتتاۋ جۇيەسى كەڭىنەن قولدانىلمايدى؛
- جوعارى جانە جوعارى وقۋ ورنىنان كەيىنگى ءبىلىم بەرۋ باعدارلامالارىنىڭ مازمۇنى ەڭبەك نارىعىنداعى وزگەرىستەردى بىلدىرەتىن جۇمىس بەرۋشىلەردىڭ تالاپتارىنا تولىق سايكەس كەلمەيدى؛
- الەۋمەتتىك ارىپتەستىك جەتكىلىكسىز دامىعان. وندىرىستىك پراكتيكا بازالارىمەن قامتاماسىز ەتۋ، تۇلەكتەردى جۇمىسقا ورنالاستىرۋ، جۇمىس بەرۋشىلەردى كاسىبي ستاندارتتاردى قۇرۋ پروتسەسىنە تارتۋ تەتىكتەرى جوق.
«سالانى دامىتۋعا كەدەرگى كەلتىرەتىن ماسەلەلەردى كەشەندى شەشۋ ماڭىزدى. ويتكەنى، ولار تەحنولوگيالىق، تەحنيكالىق، زاڭنامالىق، نورماتيۆتىك-قۇقىقتىق، قارجى-ەكونوميكالىق، ءبىلىم بەرۋ، كادرلىق جانە وزگە دە سالالارداعى ماسەلەلەردىڭ كەڭ اۋقىمىن قوزعايدى»، - دەپ تۇسىنىكتەمە بەرىلگەن قۇجاتقا.
بۇعان دەيىن حابارلاعانىمىزداي، قازاقستانداعى ماشينا جاساۋ سالاسىن دامىتۋدىڭ 2024-2028-جىلدارعا ارنالعان كەشەندى جوسپارى بەكىتىلمەك.