مەملەكەتتىك باسقارۋ، قورعانىس جانە الەۋمەتتىك قامتۋعا سالىنعان ينۆەستيتسيا 5 ەسە ارتقان

استانا. قازاقپارات - قازاقستاندا مەملەكەتتىك باسقارۋ، قورعانىس جانە الەۋمەتتىك قامتۋ سالاسىنا قۇيىلاتىن ينۆەستيتسيا ءبىر جىل ىشىندە بەس ەسە ارتقان.

ءوسىم كورسەتكىشى ەكىنشى جىل قاتارىنان بايقالىپ وتىر، دەپ حابارلايدى قازاقپارات Finprom.kz رەسۋرسىنا سىلتەمە جاساپ.

بيىل قاڭتار-اقپان ايلارىندا مەملەكەتتىك باسقارۋ جانە قورعانىس جانە مىندەتتى الەۋمەتتىك قامسىزداندىرۋ سالاسىنا قۇيىلعان ينۆەستيتسيا 15,8 ميلليارد تەڭگەگە جەتتى.

بۇل سوما ءبىر جىل بۇرىنعىعا قاراعاندا 5,1 ەسە كوپ.

وڭىرلەر اراسىندا جوعارىدا اتالعان سالالار بويىنشا ەڭ كوپ ينۆەستيتسيا تۇركىستان وبلىسىنا تيەسىلى. ياعني 4,7 ميلليارد تەڭگە، اقشامەن جىلدىق ءوسىم - 2,5 ەسە.

ودان ءارى كوشباسشىلار بەستىگىنە ماڭعىستاۋ وبلىسى (4,6 ميلليارد تەڭگە)، اباي وبلىسى (2,8 ميلليارد تەڭگە)، سقو (1,2 ميلليارد تەڭگە) مەن الماتى (871,3 ميلليون تەڭگە) كىرەدى.

ال اقمولا وبلىسىندا (1 ميلليون تەڭگە) وتە از كولەمدە ينۆەستيتسيا تارتىلعان.

جالپى 20 ءوڭىردىڭ ىشىندە جامبىل جانە ۇلىتاۋ وبلىستارىندا مەملەكەتتىك باسقارۋ، قورعانىس جانە الەۋمەتتىك قامتۋ سەكتورلارىنا ينۆەستيتسيا مۇلدەم تۇسپەگەن.

ەڭ كوپ ينۆەستيتسيا كولەمى، ياعني %66,4 بانكتىك ەمەس قارىز قاراجاتى ەسەبىنەن قامتاماسىز ەتىلگەن.

سومامەن 10,5 ميلليارد تەڭگە. وتكەن جىلى اتالعان كوزدەن قاراجات تۇسكەن جوق.

رەسپۋبليكالىق بيۋجەتتەن 2,8 ميلليارد تەڭگە (جىلدىق ءوسىم 3,4 ەسە)، جەرگىلىكتى بيۋجەتتەن 2,4 ميلليارد تەڭگە (جىلىنا ءوسىم %12) ءتۇستى.

كاسىپورىنداردىڭ ءوز قاراجاتى ەسەبىنەن 127,3 ميلليون تەڭگە ينۆەستيتسيالاندى. بۇل 2022-جىلعى قاڭتار-اقپانعا قاراعاندا %6,5 عا ارتىق.