كەيىنگى كەزدە قىزۋ تالقىلانعان توپ-5 جۇپ

استانا. قازاقپارات - كەيىنگى 2-3 ايدا قازاق ەستراداسىندا توي كوپ بولدى. جۇپتار جاي توي جاساپ قانا قويماي، قىزۋ تالقىعا ءتۇسىپ جاتتى. سەبەبى ونىڭ ىشىندە كۇيەۋى وزىنەن بىرنەشە جاس كىشى نەمەسە كۇيەۋىن جاسىرىپ جۇرگەندەر دە بولدى.

ەركە مەن رايىمبەك باقتىگەرەيەۆ

ءانشى رايىمبەك باقتىگەرەيەۆ پەن ەركە ەسماحاننىڭ ارا-قاتىناسى تۋرالى العاش بيىل قاڭتاردىڭ ورتاسىندا TikTok-تا ۆيدەولار تاراي باستادى. ەركە مەن رايمنىڭ ارا-قاتىناسىنا «زەرتتەۋ» جاسالعان. «زەرتتەۋدە» ەركەنىڭ شەتەلدە دەمالىپ جۇرگەن سۋرەتىندە ونىڭ بەتىنەن ۇستاپ تۇرعان ادام رايىمبەك ەكەنى ايتىلعان. باستاپقىدا جۇلدىزدى جۇپ قاۋەسەتتەرگە ءمان بەرمەي، جاۋاپ بەرمەگەن ەدى.

ارتىنشا رايىمبەك قاۋەسەتتەرگە نۇكتە قويىپ، ەركەمەن تۇسكەن سۋرەتىن Instagram-دا جاريالادى. وسىلايشا، Raim ەركە ەسماحانمەن اراقاتىناسى تۋرالى قاۋەسەتتەردى راستاعانداي بولعان. الايدا ءانشى ەشقانداي پىكىر بىلدىرمەدى.

سۋرەتتە ەركە مەن رايىمبەك ريمدەگى سانتا-ماريا-دەللا-ساليۋتە شىركەۋىنىڭ الدىندا ورنالاسقان مەيرامحانادا تاماقتانىپ وتىر. ەركەنىڭ سوزىنشە، ول رايىمبەكپەن 2018-جىلى تانىسقان. ەركە «بۇل قىزىققا، سىناققا تولى ماحاببات» بولعانىن ايتادى.

سول ساتتەردە جەلى قولدانۋشىلارى رايىمبەك ەركەگە دەيىن 7 جىل نارگيز اتتى قىزبەن كەزدەسكەنىن، «ونى تاستاپ كەتكەنىن» جارىسا جازا باستادى. كوپ ۇزاماي نارگيزدىڭ ءوزى بۇل جايتقا پىكىر ءبىلدىردى. ونىڭ سوزىنشە، رايىمبەك نارگيزدى تاستاپ كەتپەگەن. نارگيز جەتى جىل جۇرگەندەرىن راستاپ، ءتىپتى تويعا دايىندالىپ جۇرگەنىن ايتتى.

20- قاڭتاردا رايىمبەك پەن ەركە نەكە قيدىرىپ، 19- اقپاندا ەركەگە «سىرعا سالۋ» ءراسىمى ءوتتى.

عازرەت قاجىمۇقانوۆ پەن كامشات جولدىبايەۆا

1- ناۋرىزدا الەۋمەتتىك جەلىدە ءانشى، اكتريسا كامشات جولدىبايەۆانىڭ ۇزاتۋ تويىنان كادرلار پايدا بولدى. ءبىراق عازرەت تە، كامشات تا بۇل ۆيدەولارعا قاتىستى ەشقانداي تۇسىنىك بەرمەدى.

بۇعان دەيىن ءانشى، اكتريسا كامشات جولدىبايەۆا مەن اكتەر عازرەت قاجىمۇقان ۇلى كەزدەسىپ ءجۇر دەگەن قاۋەسەت تاراعان ەدى. ولار بىرگە تۇسكەن سۋرەتتەرىن Instagram-پاراقشالارىندا ءبولىستى.

ارتىنشا ءانشىنىڭ ءسىڭلىسى التىناي جولدىبايەۆا كامشات پەن عازىرەتتىڭ شاڭىراق قۇرعانىن راستاعانداي بولىپ، وتباسىلىق سۋرەتتى جاريالادى.

«سىزدەر كوپتەن كۇتكەن سۋرەت»، - دەيدى التىناي.

گۇلناز جولانوۆا مەن سۇيىكتىسى

18- اقپاندا اكتريسا گۇلناز جولانوۆاعا «سىرعا سالۋ» ءراسىمى ءوتتى. بۇل تۋرالى ءانشى ەركە ەسماحان جازعان بولاتىن.

گۇلنازدىڭ سۇيىكتىسى كىم ەكەنى بەلگىسىز. بۇل تۋرالى اكتريسانىڭ ءوزى دە ءتىس جارماعان. ايتا كەتەيىك، بۇعان دەيىن گۇلناز بەن اكتەر ايان وتەپبەرگەن كەزدەسكەن دەگەن قاۋەسەتتەر تاراعان بولاتىن. ايان سۇحباتتارىنىڭ بىرىندە بۇل جايتقا قاتىستى پىكىر ءبىلدىرىپ، بۇل اڭگىمەگە باياعىدا نۇكتە قويىلعانىن، گۇلناز ەكەۋى دوس ەكەنىن ايتقان ەدى.

جانار دۇعالوۆا مەن سۇيىكتىسى

بيىل 9- اقپاندا ءانشى ءارى اكتريسا رەتىندە دە تانىلعان جانار دۇعالوۆا تۇرمىسقا شىعاتىنىن سۇحباتتارىنىڭ بىرىندە راستاعان بولاتىن. ۇزاتۋ 17- ناۋرىزدا وتكەن. جاناردىڭ ءوزى جەلىگە ەشنارسە سالماعانىمەن، ونەردەگى ارىپتەستەرى ۇزاتۋ تويىنان ۆيدەولار جاريالادى.

ءانشىنىڭ ءوزى ۇزاتۋ تويىنان سۋرەتتەردى 23- ناۋرىزدا عانا جاريالادى.

جانار دۇعالوۆا ءانشى ءمادينا ءسادۋاقاسوۆانىڭ سۇيەمەلدەۋىمەن ۇزاتىلعان.

جاناردىڭ كۇيەۋى تۋرالى ازىرگە كوپ اقپارات جوق. بەلگىلىسى - ەسىمى يلياس، استانادا تۇرادى.

اسەل ءسادۋاقاسوۆا مەن سۇيىكتىسى

جاقىندا قازنەت قولدانۋشىلارى اكتريسا، ءانشى اسەل ءسادۋاقاسوۆانىڭ سۇيىكتىسىن «تاۋىپ الدى». قازىر باليدە تۇراتىن اسەل ءسادۋاقاسوۆا جەكە ومىرىندەگى جاڭالىعىن بولىسكەن بولاتىن. اكتريسانىڭ Instagram-داعى ستوريستەرىنە قاراعاندا، ونىڭ سۇيىكتىسى - ماعجان تىلەۋحانوۆ بولىپ شىققان.

اسەل بولىسكەن فوتو ارتقى جاقتان تۇسىرىلگەنىنە قاراماستان، ءسادۋاقاسوۆانىڭ وقىرماندارى ونىڭ سۇيىكتىسىن بىردەن تانىپ قويدى. ول ماعجان تىلەۋحانوۆ بولىپ شىقتى، ول اكتريسادان 7 جاس كىشى. ماعجان تىلەۋحانوۆتىڭ ءوزى ماركەتولوگ، بلوگەر ارمان يۋسۋپوۆقا تيەسىلى «پوتوك» جوباسىنىڭ نەگىزىن قالاۋشى.

massaget.kz