جاستارعا بەرىلەتىن 5 ميلليون تەڭگەگە دەيىنگى نەسيەنىڭ تالاپتارى قانداي
جاستاردى نەسيەلەۋ باعدارلاماسى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كاسىپكەرلىكتى دامىتۋ جونىندەگى 2021-2025-جىلدارعا ارنالعان ۇلتتىق جوباسى شەڭبەرىندە ىسكە اسىرىلادى.
اگرارلىق نەسيە كورپوراتسياسى جاستارعا شاعىن نەسيە بەرۋ باعدارلاماسى اياسىندا سەنىم بىلدىرىلگەن وكىل-اگەنت رەتىندە قۇجات قابىلداۋ، بيزنەس-جوبانى باعالاۋ، نەسيە جانە كەپىل تۋرالى كەلىسىمدەردى دايىنداۋ، نەسيە سوماسىن قارىز الۋشىعا بەرۋ، نەسيەنىڭ پايدالانىلۋىن تەكسەرۋ، قارىز الۋشىمەن ەسەپ ايىرىسۋدى جۇرگىزۋ، قارىز الۋشىدان تولەم قابىلداۋ جانە مەرزىمى وتكەن بەرەشەكپەن جۇمىس جانە ۋاكىلەتتى ورگاندارعا ەسەپ بەرۋ ءۇشىن جاۋاپتى.
شاعىن نەسيە 21 جاستان 35 جاسقا دەيىنگى جاس كاسىپكەرلەردى قولداۋعا باعىتتالعان. ءوتىنىش بەرگەن ساتتە جاستاردىڭ كاسىپكەر رەتىندە تىركەلگەن ۋاقىتى 5 جىلدان اسپاۋى ءتيىس. باعدارلاماعا جۇمىس ىستەيتىن جاستار دا قاتىسا الادى.
نەسيە سوماسى - 5 ميلليون تەڭگەگە دەيىن، سىياقى مولشەرلەمەسى - 2,5 پايىز. نەسيە مەرزىمى - مال شارۋاشىلىعىن دامىتۋعا ارنالسا - 7 جىل، بيزنەستىڭ باسقا دا باعىتتارى ءۇشىن - 5 جىلعا دەيىن بەرىلەدى.
«نەگىزى بورىش پەن سىياقى وتەۋ كەزىندە شاعىن نەسيە مەرزىمىنىڭ ۇشتەن بىرىنە دەيىن جەڭىلدىك كەزەڭى قاراستىرىلعان. نەسيە كەپىل مۇلىكپەن قامتىلۋى مىندەتتى. كەپىل رەتىندە جىلجىمالى ارنايى تەحنيكا جانە جىلجىمايتىن مۇلىك قابىلدانادى. كەپىل مۇلىك بولماعان جاعدايدا كەپىل بەرۋشىلەر باسقا تۋىستارى ءوز كەپىلدەرىن بەرە الادى»، - دەدى و. بايماحانوۆ استانا كوممۋنيكاتسيالار قىزمەتىندە وتكەن بريفينگتە.
ءوتىنىم قابىلداۋ 6- ناۋرىزدا باستالدى، قۇجاتتاردى «اگرارلىق نەسيە كورپوراتسياسى» ا ق فيليالدارىنا تاپسىرۋ قاجەت. فيليالداردىڭ نەگىزگى مەكەنجايلارى - agrocredit.kz سايتىندا ورنالاسقان.
قاجەتتى قۇجاتتار ءتىزىمى: جەكە باسىن كۋالاندىراتىن قۇجات، جوبا بويىنشا بيزنەس جوسپار، قىزمەت كورسەتەتىن بانكتەن شوتى بار ەكەنىن راستايتىن انىقتامالار، قارجى ۇيىمدارىنان نەسيە بەرەشەگىنىڭ، ونىڭ ىشىندە مەرزىمى وتكەن بەرەشەكتىڭ بولۋى تۋرالى انىقتامالار، قاتىسۋشىنىڭ/ۇمىتكەردىڭ جالاقىسى نەمەسە وزگە دە تابىستارىن راستايتىن قۇجات جانە جيناقتاۋشى زەينەتاقى قورىنان ءۇزىندى كوشىرمە، كەپىل مۇلىكتى باعالاۋ تۋرالى ەسەپ، كەپىل بەرۋشى جانە كەپىلمەن قامتاماسىز ەتۋ جونىندەگى قۇجاتتار.
بۇل رەتتە جىلجىمايتىن مۇلىكتى، ونىڭ ىشىندە تۇراقتى تۇرعىن ۇيلەردى ساتىپ الۋعا، جەر ۋچاسكەلەرىن ساتىپ الۋعا، باعالىق قاعازداردى ساتىپ الۋعا جانە قارۋدى، قۇرامىندا ەسىرتكى زاتتارى بار تاۋارلاردى، ويىن بيزنەسىن ۇيىمداستىرۋدى، قر زاڭناماسىنا قايشى كەلەتىن جانە تەمەكى نەمەسە الكوگول ونىمدەرىن ساتىپ الۋدى كوزدەيتىن جوبالارعا نەسيە بەرىلمەيدى.
شاعىن نەسيە بەرۋ تۋرالى شەشىمدى اكىمدىك جانىنان قۇرىلعان كوميسسيا قابىلدايدى. وعان ءماسليحات دەپۋتاتتارى، مەملەكەتتىك ورگانداردىڭ، «اتامەكەن» كاسىپكەرلەر پالاتاسىنىڭ، كاسىپكەرلەر، ب ا ق وكىلدەرى كىرەدى.
ۇمىتكەرلەر وزدەرىنىڭ بيزنەس جوسپارىن، كوميسسيا وتىرىسىندا كورسەتەدى. كوميسسيا بيزنەس جوسپارلاردى باعالاپ، ۇزدىكتەرىن ىرىكتەيدى. جوبا وزەكتى، دالەلدى، ەكونوميكالىق نەگىزدەلگەن، الەۋمەتتىك ماڭىزى بار، ومىرشەڭ جانە ونىڭ ناقتى ءىس-قيمىل جوسپارى بولۋى ءتيىس.
وسىلايشا، بيىل ەلوردادا 562 جاس كاسىپكەرگە 2,8 ميلليارد تەڭگە ءبولى قاراستىرىلىپ وتىر.