كومپيۋتەر الدىندا ۇزاق وتىراتىندارعا 5 كەڭەس

استانا. قازاقپارات – قازىر كوپتەگەن ادام كومپيۋتەر الدىندا ۇزاق ۋاقىت تاپجىلماي وتىرىپ، جۇمىس ىستەيتىندىكتەن، ءتۇرلى ماسەلەلەرمەن بەتپە-بەت كەلىپ جاتادى. سونىڭ ءبىرى - ارقانىڭ اۋرۋى، باس اۋرۋى نەمەسە ميعا وتتەگىنىڭ جەتىسپەۋى.

وسىعان بايلانىستى ءتۇرلى بەلگىلەردىڭ قوسىندىسىن «كەڭسە سيندرومى» دەپ تە اتايدى. ارينە، بۇل تەك كەڭسەدە عانا ەمەس، ۇيدە وتىرىپ تا تۋىنداۋى مۇمكىن.

كومپيۋتەر الدىندا ۇزاق وتىرعاندا اعزادا قانداي وزگەرىستەر بولادى؟

- قۇرعاق كوز سيندرومى: قىزارۋ، شارشاۋ، قۇرعاقتىق، كوزدىڭ قىشۋى جانە اشۋى.

- گيپوديناميا: مويىن، ارقا جانە اياق-قولداردىڭ اۋىرسىنۋىن، جۇرەك-قان تامىرلارى جۇيەسىنىڭ بۇزىلۋىن جانە كەيبىر جاعدايلاردا ميگرەندى تۋدىرادى.

- تاماق تانۋدىڭ بۇزىلۋى: ءتاتتى قوسىلعان شاي، جولدا ساتىپ العان جەڭىل تاعامدار جانە «ميدى ىنتالاندىرۋ ءۇشىن» تاتتىلەردى پايدالانۋ قانداعى گليۋكوزانىڭ جوعارىلاۋىنا اكەلەدى، اشتىق سەزىمىن تۋدىرادى جانە ماي قورىنا جينالادى.

- تۋننەل سيندرومى: اياق-قولدىڭ اۋىرسىنۋىنا، قولدىڭ السىزدىگىنە، شانشۋعا، قولدىڭ ىسىنۋىنە، كوزدىڭ بۇلىڭعىرلىعىنا اكەلەدى.

- ناشار قان اينالىمى اياقتىڭ ۆاريكوزىن تۋدىرادى.

- قىزمەتكەردىڭ تيىمدىلىگى تومەندەيدى: ادامعا دەمالۋ قيىن، ءومىر ساپاسى تومەندەيدى.

شەشۋ جولدارى

بۇل ماسەلە تەك جۇمىسشىعا عانا ەمەس، جۇمىس بەرۋشىگە دە قاتىستى. سول سەبەپتى «كەڭسە سيندرومىنان» ارىلۋ ءۇشىن ەكى جاقتان دا جۇمىس ىستەلۋى ءتيىس.

ەگەر ءسىز جۇمىسشى بولساڭىز:

1. جۇمىس كەستەسىن رەتتەڭىز

جۇمىسىڭىزدا قاشىقتان جۇمىس ىستەۋ، جارتى كۇندىك جۇمىس كەستەسى نەمەسە كەم دەگەندە ساعاتىنا ءبىر رەت ءۇزىلىس جاساۋ مۇمكىندىك بولا ما ءبىلىڭىز. وسى ۋاقىتقا دەيىنگى الەمدەگى جاعدايلار قاشىقتان جۇمىس ىستەۋ، جۇمىسقا بارىپ-كەلۋگە ارتىق ۋاقىت جۇمساماۋ، كەز كەلگەن جەردەن جۇمىس ىستەۋ ءىستىڭ تيىمدىلىگى مەن ونىمدىلىگىنە كەرى اسەرىن تيگىزبەيتىنىن كورسەتكەن بولاتىن.

2. جۇمىستى ءبولىپ ىستەۋ

ادەتتە كەڭسەدە جۇمىس ىستەيتىندەر «ءىستى اياقتايىن - سوسىن دەمالامىن» دەگەن ۇستانىممەن ءومىر سۇرەدى. ءبىراق ورتاسىنداعى دەمالىس ۇزاق بولماۋ كەرەك، ونداي جاعدايدا جۇمىستى جالعاستىرۋ قيىن بولادى. دەمالىپ جاتقانداي كورىنگەنىڭىزبەن، بار ويىڭىز اياقتالماعان ىستە بولادى. سول سەبەپتى شارشايسىز. دەمالىس نەعۇرلىم از ءارى ءجيى بولعان سايىن، جۇمىس تا ءونىمدى بولا تۇسەدى.

3. دۇرىس تاماقتانىڭىز

پايدالى تاماقتانۋ ارقىلى دەنساۋلىقتى ءبىر قالىپتى ساقتاپ قانا قويماي، كۇندەلىكتى اعزاداعى ەنەرگيا كولەمىن رەتتەستىرۋگە بولادى. كۇندەلىكتى تاعام راتسيونىندا ەت، ءداندى داقىلداپ، جەمىستەر مەن كوكونىستەر بولۋى كەرەك. كەڭسەدە جۇمىس ىستەيتىندەردە ادەتتە ۋاقىتىلى تاماقتانۋعا مۇمكىندىك بولمايدى. ونداي جاعدايدا ادامنىڭ اسقازان جۇمىسى بۇزىلادى.

4.كوبىرەك قوزعالۋ

ەشقايدا بارۋدىڭ قاجەتى جوق بولسا دا، ءسال ءجۇرىپ قايتۋ ءۇشىن دالاعا شىعىڭىز. كورشى كابينەتتەرگە بارىپ قايتىڭىز نەمەسە كوفە الۋ ءۇشىن بارۋعا دا بولادى. ءبىراق ءجۇرىپ-قايتۋدىڭ جولدارىن تابىڭىز، ءجيى قوزعالىڭىز.

5. ويدى الاڭداتىڭىز

ءبىر ىسكە بار نازاردى اۋدارىپ وتىرۋ كەيدە شەشىمنىڭ تابىلۋىنا ەمەس، كەرىسىنشە ويدىڭ شاتاسۋىنا اكەلەدى. ەگەر كومپيۋتەردەن ۇزاق ۋاقىت الىستاماساڭىز، بر ۋاقىت دەمالىپ الۋدى ەستەن شىعارماڭىز. ءجۇرىپ قايتىڭىز، الەۋمەتتىك جەلىنى تەكسەرىڭىز، ارىپتەستەرمەن اڭگىمە ايتىڭىز. باستىسى - ەكرانعا قاراماڭىز.

ەگەر جۇمىس بەرۋشى بولساڭىز:

- دەمالىس ورنىن ۇيىمداستىرىڭىز. ءىرى كومپانيالاردا مىندەتتى تۇردە دەمالىس بولمەلەرى بولادى. ءتىپتى، عيماراتتىڭ ءبىر ەتاجىن ارنايدى. ال كىشكەنتاي كومپانيالار ءبىر بولمەنى ارناپ، ول جەرگە ىڭعايلى ديۆان مەن ويىن ۇستەلدەرىن قويا الادى.

- ساپالى كاسىبي جيھاز بەن تەحنيكادان قاراجات اياماۋ: ىڭعايلى ۇستەل، ساپالى مانيتور وتە ماڭىزدى.

- كومپانيا جۇمىسىنا ساي تايم مەنەدجمەنت قۇراستىرۋ: جۇمىسشىلاردىڭ دەمالىسىنا نازار اۋدارىڭىز. ەگەر جۇمىسشىلار ءجيى اۋىرا باستاسا، دەنساۋلىعىنا ءجيى شاعىمدانا باستاسا جۇمىس بارىسى دۇرىس ۇيىمداستىرىلماعانىن ءتۇسىنىڭىز.

- قاشىقتان جۇمىس ىستەۋگە مۇمكىندىك بەرۋ. كۇندەلىكتى بولماسا دا، اپتاسىنا بىرنەشە كۇن جۇمىسشىعا سونداي مۇمكىندىك كەرەك. ولاردىڭ قاجەتتىلىگىن باعالايتىنىڭىز ارقىلى ولاردىڭ جۇمىسقا ىنتاسىن ارتتىرادى.

massaget.kz