قازاقستاننىڭ 5 قالاسىنداعى پرەزيدەنت رەزيدەنسيالارى بالالارعا بەرىلەدى
اتاپ ايتقاندا قوستاناي، اقتاۋ، تاراز، اتىراۋ مەن اقتوبە قالالارىنداعى عيماراتتار جاقىن ۋاقىتتا ءبىلىم بەرۋ نەمەسە دەمالىس جانە وڭالتۋ ورتالىقتارىنا اينالادى.
بۇعان دەيىن جەلىدە مەملەكەت باسشىسىنىڭ بەس قالاداعى رەزيدەنسيالارى بالالاردىڭ يگىلىگىنە بەرىلەتىنى تۋرالى اقپارات پايدا بولدى، ال جەرگىلىكتى اكىمدىكتەر بۇل عيماراتتاردى بالاباقشا نە ساۋىقتىرۋ ورتالىقتارى نە بالالارعا ارنالعان باسقا دا ورتالىقتار ەتە مە، مۇنى ءوزى شەشەدى.
«مەملەكەت باسشىسىنىڭ تاپسىرماسى ورىندالادى. قازىرگى ۋاقىتتا بەرۋ مەحانيزمى جانە قوناقۇيدى ماقساتتى پايدالانۋ ماسەلەسى پىسىقتالىپ جاتىر. شەشىمدى قوسىمشا حابارلايمىز»، - دەپ حابارلادى قوستاناي وبلىسىنىڭ اكىمدىگى.
سونىمەن بىرگە اقپاراتتى ماڭعىستاۋ وبلىسىنىڭ اكىمدىگى دە راستادى.
«راستايمىز. بۇل بويىنشا جۇمىس باستالادى. قوسىمشا اقپارات ءسال كەيىنىرەك بەرىلەدى»، - دەپ حابارلادى اكىمنىڭ باسپا ءسوز قىزمەتى.
اتىراۋ وبلىسى اكىمدىگى دە بۇل عيمارات بالالارعا ارنالعان مەكەمە رەتىندە پايدالانۋعا بەرىلەتىنىن حابارلادى.
«بولاشاقتا بۇل دەمالىس جانە ساۋىقتىرۋ ورتالىعىنا اينالادى. تيىسىنشە، تاعايىنداۋدى انىقتاعاننان كەيىن قايتا جابدىقتاۋ بويىنشا ۇيىمداستىرۋ جۇمىستارى باستالادى»، - دەدى اكىمدىكتىڭ باسپا ءسوز قىزمەتى.
جامبىل وبلىسى اكىمىنىڭ ورىنباسارى ەركىن ۇيسىمبايەۆتىڭ سوزىنشە، پرەزيدەنت رەزيدەنتسياسى مۇگەدەك بالالارعا ارنالعان ساناتوري نەمەسە جازعى لاگەر بولادى. بۇل تۋرالى ناقتى شەشىم كەيىنىرەك قابىلدانادى.
اقتوبە وبلىسى اكىمدىگىنىڭ وكىلى قارعالى وزەنى بويىندا ورنالاسقان نىساندى بالاقايلاردىڭ قاجەتىنە باعىتتاۋعا ارنالعان شارالار قولعا الىنعانىن جەتكىزدى. قازىر ءزاۋلىم عيمارات بوس تۇر. تەك ءتۇرلى دەلەگاتسيا كەلگەن كەزدە عانا سوندا تۇراقتايدى. كەشەندە اكىمشىلىك- تۇرمىستىق مىندەتتەردى اتقاراتىن جۇمىسشىلار ەڭبەك ەتەدى. الايدا نىساننىڭ بالالارعا ناقتى قاشان بەرىلەتىندىگى ازىرگە بەيمالىم.
ەرجان بايتانايەۆ، وبلىس اكىمى اپپاراتى باسشىسىنىڭ ورىنباسارى:
- بەرىلەتىن مەكەمەگە، بالالارعا بەرىلسە بالالارعا، لاگەر بولاتىن بولسا لاگەرگە ءبىز جابدىقتاپ بەرۋىمىز كەرەك. سول جۇمىستاردىڭ بارلىعىن جۇرگىزەمىز. ول قۇجاتتاردىڭ بارلىعى راسىمدەلۋ كەرەك. قازىرگى ۋاقىتتا بۇل تاپسىرما بويىنشا ءبىز مەملەكەتتىك ورگاندارمەن، ورتالىق مەملەكەتتىك ورگاندارمەن راسىمدەۋ جۇمىستارىن باستادىق.
www.24.kz