جارىلقاپ بەيسەنباي ۇلىنىڭ 5 تومدىق شىعارمالار جيناعى جارىق كوردى

None
استانا. قازاقپارات - جاقىندا بەلگىلى جۋرنالشى، جازۋشى، زەرتتەۋشى جارىلقاپ بەيسەنباي ۇلىنىڭ 5 تومدىق شىعارمالار جيناعى جارىق كوردى.

كوپتومدىققا نەگىزىنەن قالامگەردىڭ سۇيەكتى تۋىندىلارى ىرىكتەلىنىپ ەنىپ وتىر. بۇل تۋرالى قازاقپارات «Egemen Qazaqstan» رەسپۋبليكالىق گازەتىنە سىلتەمە جاساپ حابارلايدى.

العاشقى تومدا وتكەن عاسىردىڭ جەتپىسىنشى-سەكسەنىنشى جىلدارى وقىرمان قاۋىم جىلى قابىلداعان، الەمدىك بەينەلەۋ ونەرى تاريحىنداعى جاڭاشا ءداۋىردىڭ ۇلى شەبەرلەرى مەن قازاقتىڭ ساڭلاق سۋرەتكەرلەرى جايىنداعى ەسسەلەر شوعىرى جيناقتالعان «بۋىرقانعان بوياۋلار»، سونداي-اق ۇلتىمىزدىڭ وزىق ادەپ داستۇرلەرى مەن حالىقارالىق ەتيكەت ەرەجەلەرى ساباقتاستىرىلا قاراستىرىلعان «ادەپ الەمى» كىتاپتارى قايتا وڭدەلىپ، تولىقتىرىلىپ بەرىلگەن. اۆتوردىڭ تاريح كوشى، بابا جۇرتتار ىزىمەن شەتەلدەرگە بارعان جولساپار جازبالارى دا وسى تومدا قامتىلعان.

ەكىنشى تومدى كوپ جىلدار بويى شوقان ءۋاليحانوۆتىڭ ءومىرىن زەردەلەپ، ۇلى عالىمنىڭ 1856-جىلى جاساعان ىستىقكول ساپارىنىڭ ءىزىن قايتالاي ءجۇرىپ وتكەن، ول ەڭبەك ەتىپ، عۇمىر كەشكەن مەكەندەردە ارنايى بولعان قارىمدى جازۋشىنىڭ جاڭا عىلىمي، مۇراعاتتىق قۇجاتتارمەن بايىتىلعان، كولەمى 743 بەتتىك «شوقان» تاريحي-عۇمىرنامالاق رومان-ەسسە كىتابى قۇرايدى. ءۇشىنشى تومعا اۆتوردىڭ «قازاق شەجىرەسى»، «ارعى تۇركتەر اقيقاتى ىزىمەن» اتتى ەڭبەكتەرى، «شوقان ءۋاليحانوۆ - اۋىز ادەبيەتى مەن ورتاعاسىرلىق جازبا مۇرالار زەرتتەۋشىسى» جانە جوشى ۇلىسىنىڭ ايگىلى بەكتەربەگى، قازاقتىڭ ەتنوتەكتىك تاريحىندا ەلەۋلى ورنى بار ناعاناي ۇلىبي تۋرالى «ناعاناي ءبي» عىلىمي زەرتتەۋلەرى ەنگەن.

قالامگەر عالىمنىڭ حالىقارالىق تۇركى اكادەمياسىنىڭ جوباسى بويىنشا «قازىرگى تۇركولوگيا» سەرياسىمەن 2015-جىلى ەلورداداعى «عىلىم» باسپاسىنان جارىق كورگەن «ورتالىق ازياداعى ارعىتۇرك سيپاتتى مادەنيەتتەر: ەتنوتەكتىك اسپەكتىلەر» اتتى اۋقىمدى مونوگرافياسىنىڭ وڭدەلىپ، تولىقتىرىلعان سوڭعى نۇسقاسى شىعارمالاردىڭ ءتورتىنشى تومىن قۇرايدى. بەسىنشى تومعا ۇلتىمىزدىڭ ۇلى تۇلعالارى مەن باسپا ءسوز سالاسىنىڭ كورنەكتى وكىلدەرىنە قاتىستى ەسسەلەرى، ءوزى قىزمەت ەتكەن اقپارات قۇرالدارى تۋرالى ماقالالارى، بەرگەن سۇحباتتارى، كىتاپتارى مەن زەرتتەۋلەرىنە قاتىستى رەتسەنزيالار، اۆتور تۋرالى لەبىزدەر، اۋدارىلعان دۇنيەلەرى توپتاستىرىلعان.

قارىمدى قالامگەر، زەرتتەۋشى-جۋرناليست جارىلقاپ بەيسەنباي ۇلى ءبىرقاتار قازاق باسىلىمىندا ابىرويلى قىزمەت اتقارعان تۇلعا. ول 1969-1990-جىلدارى «لەنينشىل جاس» (قازىرگى «جاس الاش») گازەتىندە ادەبي قىزمەتكەر، ءبولىم مەڭگەرۋشىسى، جاۋاپتى حاتشى بولىپ ىستەدى. 1990—1997-جىلدارى «انا ءتىلى» گازەتىنىڭ تۇڭعىش باس رەداكتورى بولدى. 1997-جىلدىڭ سوڭىنان قازاق اقپارات اگەنتتىگى ديرەكتورىنىڭ ورىنباسارى، 2002-جىلدان وسى اگەنتتىك نەگىزىندە قۇرىلعان «قازاقپارات» ۇلتتىق كومپانياسى ا ق- ى قازاق رەداكسياسىنىڭ باس رەداكتورى. 2014-2017-جىلدارى «مادەني مۇرا» - «كۋلتۋرنوە ناسلەديە» جۇرنالىنىڭ باس رەداكتورى. جارىققا شىعىپ وتىرعان بەس تومدىق - ارداگەر جۋرناليستىڭ زەينەت جاسىندا دا شىعارماشىلىقتان قول ۇزبەگەنىنىڭ ءبىر ايعاعى.


سوڭعى جاڭالىقتار