قايىرىمدى ىستەر مارافونى اياسىندا 5 ميلليون ادامعا اتاۋلى كومەك كورسەتىلدى
بۇل تۋرالى اقپارات جانە قوعامدىق دامۋ ءمينيسترى اسقار ۋماروۆ ءمالىم ەتتى، دەپ حابارلايدى قازاقپارات ءتىلشىسى.
«Birgemiz» ۆولونتەرلەردىڭ رەسپۋبليكالىق فرونت- كەڭسەسى مەن ونىڭ 17 وڭىردەگى فيليالىنىڭ جۇمىسىن ەرەكشە اتاپ وتكەن ءجون. بۇگىندە QazVolunteer.kz پلاتفورماسى ۆولونتەرلىك قىزمەت بويىنشا ءبىرىڭعاي اقپاراتتىق رەسۋرسقا اينالدى. اتالعان پلاتفورما 53 مىڭعا جۋىق ۆولونتەردى، 1000 نان استام جوبا مەن 3,4 مىڭنان استام ۆولونتەرلىك ۇيىمدى بىرىكتىرەدى»، - دەدى اسقار ۋماروۆ ەلوردادا وتكەن ورتالىق ازيا ەلدەرى ۆولونتەرلەرىنىڭ فورۋمىندا.
ءمينيستردىڭ ايتۋىنشا، «Birgemiz» جالپىۇلتتىق جوباسى اياسىندا 8 باعىت بويىنشا ۆولونتەرلىك جۇيە قۇرىلدى.
«تەك وتكەن جىلدىڭ وزىندە وعان 70 مىڭنان استام ۆولونتەر قاتىستى. جاناشىر قازاقستاندىقتار ءتۇرلى قيىندىققا تاپ بولعان بالالار مەن جاستارعا كومەكتەسىپ جاتىر. ەرىكتى ازاماتتار مەديتسينا، الەۋمەتتىك جانە ەكولوگيالىق ۆولونتەرلىك سالاسىندا قول ۇشىن سوزۋدا. جانۋارلاردى قورعاۋ مەن ماتەريالدىق جانە رۋحاني مادەني- تاريحي مۇرانى ساقتاۋ ىسىندە دە ۆولونتەرلەردىڭ ەڭبەگى زور. سونىمەن قاتار، ۆولونتەرلەر توتەنشە جاعدايلارعا تاپ بولعان جانداردىڭ ءومىرىن ساقتاپ قالۋعا اتسالىسۋدا»، - دەيدى ول.
ودان بولەك، اسقار ۋماروۆ جالپى ۇلتتىق «قايىرىمدى ىستەر مارافونى» اكسياسى اياسىندا 5 ميلليون ازاماتقا 6,2 ميلليارد تەڭگەگە اتاۋلى كومەك كورسەتىلگەنىن ايتتى.
بۇعان دەيىن حابارلاعانىمىزداي قازاقستاندا ۆولونتەرلىك تۋرالى زاڭنىڭ ورىندالۋىنا مونيتورينگ جۇرگىزىلمەك.