قوستانايدا جوعالعان 5 جاسار قىزدى ىزدەستىرۋ تاسىلدەرى وزگەردى
ەندى ءتارتىپ ساقشىلارى مەن ەرىكتىلەر بالانىڭ مىنەز- قۇلقىنداعى ەرەكشەلىگىن ەسكەرىپ، ىزدەستىرۋدى تىنىش رەجيمدە جۇرگىزىپ جاتىر، دەپ حابارلايدى قازاقپارات ءتىلشىسى.
«ىزدەۋ شارالارىنىڭ تاكتيكاسى ماماندار ۇسىنىسى نەگىزىندە وزگەرتىلدى. ىزدەستىرۋ بالانىڭ مىنەز- قۇلقىنداعى ەرەكشەلىگىن ەسكەرە وتىرىپ، تىنىشتىق رەجيمىندە جۇرگىزىلىپ جاتىر. اۋماقتى ءتىنتۋ باعىتى دا وزگەردى. ەگەر بۇرىن اۋماقتى زەرتتەۋ توبىل وزەنىنىڭ بويىمەن جۇرگىزىلسە، ەندى توبىلدان جامبىل اۋىلىنا قاراي باعىت الادى. تۇندە ادامدى دەنە تەمپەراتۋراسىنىڭ جىلۋىمەن انىقتايتىن تەپلوۆيزورلار ارقىلى ىزدەۋ تاكتيكاسى قولدانىلدى. تاڭەرتەڭ ءتورت باعىت بويىنشا 100 شاقىرىمعا دەيىنگى ىزدەۋ ايماعىن قايتا ءجۇرىپ ءوتۋ جۇمىستارى باستالدى»، - دەپ ءمالىم ەتتى جەرگىلىكتى قۇزىرلى ورگاننىڭ باسپا ءسوز قىزمەتىنەن.
ەسكە سالايىق، كەشە قوستاناي قالاسىندا ءىز- ءتۇزسىز جوعالعان بەس جاسار ءمادينا ەرلان قىزىن ىزدەۋ شارالارى اياسىندا ەگىستىك القاپتىڭ ءار جەرىنە سۋسىن مەن تاماق بايلانعان شارلار قالدىرۋ جونىندە شەشىم قابىلداندى. سونداي- اق، كەشكى ۋاقىتتا ەگىستىك القابىنىڭ ۇستىنەن دەلتاپلاندار ۇشىرىلادى.
كۇنى كەشە ىزدەۋ جۇمىستارىنا رۋدنىي قالاسىنان ارنايى موتودەلتاپلان جۇمىلدىرىلدى. وعان قوسا 500-دەن اسا قالا تۇرعىندارى قوسىلدى. كاسىپورىندار مەن ۇيىمداردىڭ وكىلدەرى كومەككە قول ۇشىن سوزىپ جاتىر. ىزدەۋشىلەر ءمادينا ەرلان قىزى تۇراتىن جامبىل اۋىلىنان بولەك، قوستاناي قالاسى، التىن دالا جانە سامير ەلدى مەكەندەرىن ارالاپ ءجۇر. وسى ورايدا الەۋمەتتىك جەلىدە ىزدەستىرۋ كەزىندەگى ۆيدەولار جاريالاندى. جەلى قولدانۋشىلارى كادردىڭ بىرىنەن جوعالعان قىزدىڭ سۇلباسىن بايقاعان. ولار ءبۇلدىرشىن ىزدەستەستىرۋ توبىنا جاقىن جەردە بولۋى مۇمكىن دەپ پايىمداپ وتىر.
ەستەرىڭىزدە بولسا، ءمادينا 7- تامىز كۇنى تاڭەرتەڭ ۇيىنەن قاشىپ كەتكەن بولاتىن.
اۆتور ءاليحان اسقار