الاياقتاردىڭ ارباۋىنا تۇسكەن اقمولالىق ايەل 5 ميلليون تەڭگەگە الداندى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، تامىزدىڭ 4 ىندە سەلينوگراد اۋداندىق پوليتسيا بولىمىنە 36 جاستاعى جەرگىلىكتى تۇرعىننان ءوتىنىش تۇسكەن.
«بەلگىلى بولعانداي، ول ينتەرنەت الاياقتارى قولداناتىن ەڭ كوپ تارالعان سحەماعا تاپ بولعان. 1- تامىزدا الدەكىم زارداپ شەگۋشىنىڭ تەلەفونىنا قوڭىراۋ شالىپ، ءوزىن 2-دەڭگەيلى بانكتەردىڭ ءبىرىنىڭ قاۋىپسىزدىك قىزمەتىنىڭ قىزمەتكەرى دەپ تانىستىرعان جانە قازىرگى ۋاقىتتا ونىڭ اتىنان نەسيە الۋعا ءوتىنىش تۇسكەنىن حابارلاعان. ۇرەيى ۇشقان ايەل الاياقپەن سويلەسىپ تۇرعانىن تۇسىنبەگەن، ال ول بولسا، ۇيالى تەلەفونىنا قوسىمشانى جۇكتەۋ ارقىلى زاڭسىز ارەكەتتەردى توقتاتۋعا بولاتىندىعىنا سەندىرگەن»، - دەدى ۆەدومستۆودان.
پوليتسيا دەپارتامەنتىنىڭ باسپا ءسوز قىزمەتىنەن اتاپ وتكەندەي، الاياقتاردىڭ نۇسقاۋلارىن ورىنداي وتىرىپ، اۋىل تۇرعىنى قاجەتتى قوسىمشالاردى ورناتىپ، كەيىن ەكى بانكتەن جالپى سوماسى 5200000 تەڭگەدەن استام نەسيە راسىمدەگەن.
اقشا بىردەن الاياقتاردىڭ شوتىنا اۋدارىلعان. تەك 3 كۇننەن كەيىن ايەل الداۋدىڭ قۇربانى بولعانىن ءتۇسىنىپ، پوليتسياعا جۇگىنگەن.
«قازىرگى كەزدە، وسىعان بايلانىستى قىلمىستىق كودەكستىڭ 190-بابى 3-بولىگى «الاياقتىق» بويىنشا سوتقا دەيىنگى تەرگەۋ امالدارى جۇرگىزىلىپ جاتىر»، - دەدى ۆەدومستۆودان.
ايتا كەتسەك، ەلىمىزدە ينتەرنەت پەن تەلەفون ارقىلى الاياقتىق جاساۋ فاكتىلەرى كوبەيىپ بارادى.
2016-جىلى 1 مىڭ دەرەك تىركەلگەن بولسا، 2021-جىلى 21 مىڭعا جەتكەن. وسى ورايدا، سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قىركۇيەك ايىنىڭ سوڭىنا دەيىن بايلانىس وپەراتورلارى الاياقتار قوڭىراۋ شالاتىن جالعان تەلەفون نومىرلەرىن انىقتاپ، بۇعاتتايتىندىعىن ءمالىم ەتتى.