بالا نەگە سويلەمەيدى: اتا-انالار ءجيى جىبەرەتىن 5 قاتەلىك

نۇر-سۇلتان. قازاقپارات - ادەتتە، بالا ميدىڭ ناقتى بولىكتەرىندە سويلەۋ قىزمەتىنە جاۋاپ بەرەتىن نەيروندى بايلانىستاردىڭ جەتىلىمسىزدىگىنەن كەش سويلەيدى. وعان گيپوكسيا سەكىلدى قۇرساقىشىلىك پروبلەمالار اسەر ەتەدى.

بۇل پروبلەمانىڭ سالدارى جايلى حاباردار اتا- انالار جۇكتىلىكتىڭ سوڭعى ايلارىندا دارىگەرگە قارالىپ، جاڭا تۋعان نارەستەگە ارنالعان جاتتىعۋلار جيىنتىعىن الادى. الايدا بالا 2,5-3 جاسىندا سويلەپ باستاماسا، ونىڭ اتا- اناسى ءبىر نەمەسە بىرنەشە قاتەلىك جىبەرگەن بولۋى دا مۇمكىن.

1. ءساتتى وتكىزىپ الادى

اتا-انانىڭ جاڭا تۋعان نارەستەنىڭ دامۋ كەزەڭدەرى جايلى بىلگەنى دۇرىس. ەگەر ولار ودان حابارسىز بولسا، بالانىڭ تۋىلعاننان كەيىنگى دۇرىس ەمەس دامۋىنا ءمان بەرمەۋى مۇمكىن. ناتيجەسىندە، ول بالانىڭ سويلەۋىن تەجەيدى. مىسالى، اكە مەن شەشە بالانىڭ زياتكەرلىك دامۋىنا ءىرى جانە ۇساق موتوريكانىڭ قاجەت ەكەنىن بىلمەي قالۋى مۇمكىن. ال ول ارقىلى بالانىڭ سويلەۋى مەن باسقا دا ماڭىزدى قىزمەتتەرى داميدى.

جاڭا تۋعان نارەستەنىڭ موتوريكاسىن دامىتۋدىڭ ماڭىزدى كەزەڭدەرى: زاتتى اڭدۋ، ۇستاۋ، ءبىر قولدان ەكىنشى قولعا بەرۋ، ويىنشىقتاردى اۋىزعا سالىپ كورۋ، اۋناۋ، ەڭبەكتەۋ، العاشقى قادامىن جاساۋ. بۇل كەزەڭنىڭ اربىرەۋى قاجەت، ەگەر ولاردىڭ بىرەۋى جاسالماسا، بىردەڭە دۇرىس ەمەس بولۋى مۇمكىن.

ەگەر بالا ەڭبەكتەمەي، بىردەن ءجۇرىپ كەتسە، ناتيجەسىندە كوگنيتيۆتى پروبلەمالار پايدا بولۋى مۇمكىن. ول سويلەۋگە عانا قاتىستى ەمەس، وقۋ نەمەسە بىردەڭە ۇيرەنۋگە دە اسەر ەتەدى. مىسالى، جاڭعاقتاردى ءبىر ىدىستان ەكىنشىگە سالۋ، پازل جيناۋ، سۋرەتتەردى ەكى قولمەن بىرگە اۋدارۋ نەمەسە كەزەكتەسە اۋدارۋ - بۇل ديناميكالىق موتوريكا. بۇل دا بالانىڭ سويلەۋىنىڭ دامۋىنا اسەر ەتەدى: سوزدەردى بولەك- بولەك ايتپاي، ولاردان سويلەم قۇراۋعا كومەكتەسەدى.

2. بالامەن سويلەسپەيدى

بالالاردىڭ كەش سويلەۋىنىڭ كەڭ تاراعان سەبەپتەرىنىڭ ءبىرى - اتا- انانىڭ ونىمەن سويلەسپەۋى. ادەتتە، جاس اتا- انالار بالانى ەرەسەكتەردىڭ سوزدەرىن تۇسىنۋگە ءالى كىشكەنتاي دەپ سانايدى. بالا اڭگىمەنى جالعاستىرا المايتىندىقتان، ونىمەن سويلەسۋدىڭ قاجەتى جوق دەپ ويلايدى. الايدا بالا دۇنيەگە كەلگەننەن باستاپ ەرەسەكتەردىڭ - اناسىنىڭ، اكەسىنىڭ جانە ۇيدە تۇراتىن باسقا دا ادامداردىڭ سوزدەرى مەن داۋىستارىن ەستۋى كەرەك. وسىلايشا، بالا داۋىس ىرعاعىن اڭعارادى، دىبىستاردى انىقتايدى جانە مەڭگەرەدى، سوزدەرىن جاتتايدى. كوپشىلىك ەرەسەككە مونولوگتار جالىقتىرعىش كورىنگەنىمەن، ول ءسابيدىڭ دامۋى ءۇشىن ماڭىزدى.

3. ەرتە نەمەسە ءجيى گادجەت ۇستاۋعا رۇقسات بەرەدى

بالانىڭ كەش سويلەۋىنىڭ تاعى ءبىر سەبەبى - گادجەتتەر. اتا-انالار اقپاراتتىق تەحنولوگيا زامانىندا گادجەتتەرسىز ءومىر ءسۇرۋ مۇمكىن ەمەس دەپ ويلايدى. سول ءۇشىن ولار مۋلتفيلمدەر، دامىتۋشى باعدارلامالار جانە ەرتەگىلەر جۇكتەپ الىپ، ولاردى بالالارعا بەرەدى. وسى جەردە پروبلەما تۋىندايدى. سەبەبى بالالار زاتتاردى كەشەندى قابىلدايدى. ياعني، بالا ەكراننان كورگەن شاردىڭ دوڭگەلەك ەكەنىن ءتۇسىنۋ ءۇشىن ونى جاي كورۋ جەتكىلىكسىز. ول شاردى ۇستاپ، يىسكەپ جانە جالاپ كورۋى كەرەك. ال پلانشەت ونداي مۇمكىندىك بەرمەيدى. سوندىقتان بالانىڭ ەرىكسىز شىعارماشىلىعى تومەندەيدى جانە ءتۇرلى قىزمەتتەردىڭ، سونىڭ ىشىندە، سويلەۋ مەن ديكتسيانىڭ دامۋ مۇمكىندىگى شەكتەلەدى. سول سەبەپتى بالا ومىرىندە ەڭ بولماعاندا 2 نەمەسە 3 جاسقا دەيىن گادجەتتەر مەن تەلەديداردىڭ بولماعانى ءجون.

4. بالاعا سىن ايتادى

بالا ەندى- ەندى سويلەي باستاعاندا كەي اتا-انالار ونى ءجيى تۇزەي بەرەدى. بۇل ادەتىمەن ولار بالانىڭ ىنتاسىن باسىپ تاستايدى دا، ساناسىز تۇردە ۇندەمەۋگە ماجبۇرلەيدى. ونىڭ ورنىنا بالانى قولداڭىز. ەگەر ول دۇرىس ايتپاسا، دۇرىس ايتىپ قايتالاڭىز، ءبىراق ودان قايتادان ايتۋىن تالاپ ەتپەڭىز جانە وعان ۇرىسپاڭىز.

بالا كەي سوزدەردى ءوز تىلىندە ايتۋى مۇمكىن. مىسالى: سۋدى - بۋ، اپكەسىن فاريزا ەمەس - بايبۋ. بۇل كەزدە دە ونى اركەز تۇزەتۋدىڭ قاجەتى جوق، وعان كەي سوزدەردى ءوز قالاۋىنشا ايتۋعا مۇمكىندىك بەرىڭىز. باستىسى، ءسىز دە ونىڭ تىلىمەن سويلەپ كەتپەڭىز. مىسالى، بالا ءتۇسىنۋ ءۇشىن «بۋ ىشەسىڭ با دەمەي»، سۋ دەپ دۇرىستاپ سويلەڭىز. ايتپەسە، اتا-انا دا بالا تىلىمەن سويلەيتىن بولسا، ول بالانىڭ كەش سويلەۋىنە سەبەپ بولا الادى.

5. وتە ۇزاق سويلەمدەر قولدانادى

كەيدە اتا-انالار بالامەن ەرەسەكتەرمەن سياقتى سويلەسەدى. ۇزىن ادەبي سويلەمدەردى قابىلداۋ بالاعا قيىنعا سوعادى. سول سەكىلدى قاتتى ەركەلەتىپ سويلەسۋگە دە بولمايدى. بالامەن اڭگىمەلەسۋ كەزىندە انىق سوزدەردەن قۇرالعان قىسقا قاراپايىم سويلەمدەردى قولدانۋ كەرەك: «كەتتىك، دالاعا شىعامىز!»، «ۇيىقتايسىڭ با؟»، «ماعان ۇلكەن دوپتى اكەلىپ بەرشى».

اقپارات دەرەككوزى: «ماسساگەت»