ءومىرىڭىزدى ۇزارتاتىن 5 مينۋت
كەيبىر سپورتشىلار قاراپايىم حالىققا بەرگەن كەڭەستەرىنىڭ ىشىندە ليفتپەن ەمەس، كادۋىلگى ساتىمەن كوتەرىلىڭىز دەپ كوپ ايتادى. بۇل ارقىلى ءسىز قۇدايدىڭ قۇتتى كۇنى اياق بۇلشىق ەتتەرىڭىز بەن جۇرەك قان تامىرلارىن كەڭەيتە الاسىز، دەيدى.
بۇل، ارينە، اسىرا سىلتەۋشىلىك. مويىندايىقشى، ءبىز كەرەمەت دەنساۋلىق پەن سىمباتتىلىققا مۇمكىندىگىنشە تەز قول جەتكىزگىمىز كەلەدى عوي؟ ال ساتىمەن كوتەرىلۋ قىزىقسىز ءارى ۇزاق ۋاقىت بويى جاسالاتىن جاتتىعۋ. ونىڭ ۇستىنە اسىعىپ تا بارا جاتامىز. ءبىراق، شىندىعىنا كەلەر بولساق، ءسىزدىڭ جاساعان ءاربىر جاتتىعۋىڭىز ءار كۇننىڭ ءبىر مەزگىلىندە، قاجەتتى مولشەرىندە بولسا، ونىڭ پايداسى جوق ەمەس.
كومپيۋتەر الدىندا كوپ وتىراتىن بولساڭىز، موينىڭىزدى ءارلى- بەرلى بۇرعاندا قىتىرلاپ، بەيۋاقىتتا اۋىرىپ شىعا كەلەتىنىن بايقايتىن شىعارسىز؟ ال سول جاعىمسىز اسەرلەردىڭ ەرتە باستان الدىن العىڭىز كەلسە، ءار تاڭدا قالامدى اۋزىڭىزعا سالىپ، اۋاعا ءوز اتى-ءجونىڭىزدى نەمەسە الىپبيدەگى ارىپتەردى تەرىپ «جازىپ شىعىڭىز». ايتپاقشى، بىزدە، قازاق تىلىندە باسقا تىلدەرگە قاراعاندا ءارىپ سانى كوبىرەك، سوندىقتان دا جاتتىعۋ ءسىز ءۇشىن پايدالىراق بولادى. ال قىتايلىقتاردىڭ 10000 يەروگليفپەن الىسىپ ابدەن تەرلەيتىنى انىق.
تەڭىز تۇزىنىڭ دا پايداسى جوق ەمەس. سوندىقتان قول بوستا ونى ساتىپ الىپ قويىڭىز دا، جىلى سۋمەن ءار تاڭدا تاماقتى شايىپ ءجۇرىڭىز. بۇدان تىسىڭىزگە دە، مينداليندەرىڭىزگە دە، اۋىز قۋىسىنىڭ سىلەكەي بەزدەرىنە دە ەكستاز سىيلايسىز.
تىنىس الۋ جاتتىعۋلارى تەك كوپ مولشەردە وتتەگى الۋمەن ولشەنبەيدى. ءتىپتى كەرىسىنشە. تىنىس الۋ جاتتىعۋلارى كەزىندە تىنىس الماۋعا تىرىسىپ كورىڭىز. كارديوحيرۋرگ، اكادەميك اموسوۆ دەگەن عالىم 90 جىل ءومىر سۇرگەن. ونىڭ تىنىس الۋ جاتتىعۋلارى تۋرالى بىلاي دەگەنى بار: «قانداي دا ءبىر جاسۋشا ءبىرىنشى كەزەكتە قىسىم مەن شەكتەۋلەردى تالاپ ەتەدى». ونىڭ ايتقىسى كەلگەنى دە وسى، اۋانى وكپەگە جيناپ، قايتا شىعارعان سوڭ دەمالماي 3 مينۋت بويى شىداپ كورىڭىز. ەگەر تىنىس الۋ جاتتىعۋلارىن كۇندەلىكتى جاساپ جۇرسەڭىز، 3 مينۋتتىق سىناق ءسىز ءۇشىن وڭاي بولادى. ەسىڭىزدە بولسىن: دجانلۋكو دجەنوني ەسىمدى دايۆەر تىنىس الماي 18 مينۋت 3 سەكۋند شىداپ، رەكورد جاڭارتقان بولاتىن.
ۇيىقتار الدىندا اياعىڭىزدى سۋىق سۋمەن جۋىڭىز. بۇل جاتتىعۋدى 1 مينۋت قانا جاساڭىز، كەيىن ءبىر دەمدە اياعىڭىزدى ءسۇرتىپ، كەپتىرىڭىز. ءبىرىنشى پايداسى، بۇدان ءسىز جىلدام ۇيقىعا كەتەسىز. ەكىنشىدەن، اياق قان تامىرلارىنىڭ جۇمىسىنا اجەپتاۋىر دەم بەرەسىز. ءتىپتى، كەيبىر ماماندار بۇل جاتتىعۋدى كەيبىر سپورت تۇرىنەن كەلەتىن پايدامەن سالىستىرۋعا دا بولادى دەيدى.
كەلەسى جاتتىعۋدا ەكى يىعىڭىزدى قابىرعاعا تيگىزىپ تۇرىپ باسىڭىزعا كىتاپ قويىپ ءجۇرىپ كورىڭىز. بۇل ءىس وڭايعا سوقسا، 10 رەتتەن وتىرىپ-تۇرىڭىز. قاراپايىم عانا ءادىس ءسىزدىڭ دەنەڭىزدىڭ، ءجۇرىسىڭىزدىڭ ءتۇزۋ بولۋىنا ىقپال ەتەدى.
تەك اۋىزبەن تاماقتانۋعا بولادى دەپ ويلاساڭىز قاتەلەسەسىز. سەبەبى كەيدە ءسىزدىڭ تەرىڭىز دە اعزاعا قاجەتتى زاتقا اشقاراق كەلەدى. ەگەر دۋش قابىلدار الدىندا، 3-4 مينۋت بۇرىن دەنەڭىزگە بال جاقساڭىز، تەرىڭىز سول ساتتە-اق قىرىققا تاياۋ دارۋمەندى وزىنە قابىلداپ الادى. مۇنداي دارۋمەندەر مەن باسقا دا پايدالى ميكروەلەمەنتتەر ادەتكى جاعدايدا تەرىگە جەتە بەرمەيدى.
كوزدى دەمالدىرۋ ءۇشىن جاسالاتىن ەڭ كەرەمەت جاتتىعۋ - ەشتەڭەنى دە كورمەۋ. ءبىراق ءبىزدىڭ قاباق تەرىمىز جۇقا بولعاندىقتان، كوز تىنىشتىعىن الا المايمىز. ونىڭ ۇستىنە قاپ-قارا تۇنەكتە دە ءبىزدىڭ كوزىمىزگە مي تىنىشتىق بەرمەيدى: كەيبىر نۇكتەلەر، دوڭگەلەكتەر، سىزىقتار، تاعى دا سول سياقتى قيالعا كەلگەن زاتتار كوز الدىمىزدا بولادى. دەسە دە، بۇدان قۇتىلار جول بار. اۋەلى كوزىڭىزدى جۇمىڭىز. ەكى الاقانىڭىزدى قاباعىڭىزعا تيمەيتىندەي ارالىقتا ۇستاپ تۇرىڭىز. كوز الدىڭىزداعى نەبىر فيگۋرالار ويناقتاپ بولعان سوڭ قويۋ قاراڭعىلىقتى بايقاڭىز. قاپ-قارا تۇنەك. وسىلاي جاتتىعۋ جاساپ وتىرعانىڭىزعا ەكى مينۋت بولعاندا ەشتەڭە دە تۇسىنبەگەنىڭىزدى بىلەسىز.
ءبىراق بۇل ءادىس ارقىلى كوزىڭىزدىڭ مونيتوردان ءسال دە بولسا دەمالعانىنا كوز جەتكىزەسىز.
دايىنداعان: ارداق قۇلتا