بەس بالانى باۋىرىنا باسقان وتباسى 5 ميلليون تەڭگەمەن ماراپاتتالدى
س ق و- دا «مەرەيلى وتباسى» ۇلتتىق بايقاۋىنىڭ وبلىستىق كەزەڭىنە 17 جەڭىمپاز وتباسى قاتىستى.
باس جۇلدە شال اقىن اۋدانى ولگينكا اۋىلىنداعى كرەيدۋن كوپبالالى وتباسىنا بۇيىردى. وتاعاسى سەرگەي كرەيدۋن شارۋا قوجالىعىندا مەحانيزاتور بولىپ جۇمىس ىستەيدى.
زايىبى يننا اندرەيەۆنا - 30 جىلدان بەرى باستاۋىش سىنىپ مۇعالىمى. ولاردىڭ شاڭىراق كوتەرگەندەرىنە 30 جىلعا جۋىق. تۇڭعىشى اندرەي مەن قىزى ۆيولەتتا ەر جەتكەن، ءوز الدىنا وتاۋ قۇرعان.
«2017-جىلى «پاتروناتتىق وتباسى» باعدارلاماسى بويىنشا ءبىز بەس بالانى تاربيەمىزگە الدىق. ولار: ليۋبوۆ، ۆالەنتينا، پەتر، مارگاريتا جانە ۆەرونيكا. بۇل شەشىمگە ەشقاشان وكىنگەن ەمەسپىز، ولار ءبىزدىڭ ءوز بالامىزداي بولىپ كەتتى»، - دەيدى وتاناسى يننا كرەيدۋن.
اندرەي قوسالقى شارۋاشىلىقپەن اينالىسادى، ۆيولەتتا - تاربيەشى، ليۋبوۆ 2-كۋرس ستۋدەنتى. ۆالەنتينا، مارگاريتا، ۆەرونيكا جانە پەتر مەكتەپتە وقيدى. ولاردىڭ بارلىعى قازاق ءتىلىن ەركىن مەڭگەرگەن.
«بالالارىمىزدى ماقتان تۇتامىز. ءبىز بالاعا ءومىر سىيلاساق، ولار ءبىزدىڭ ءومىرىمىزدىڭ ماعىناسى. بۇگىن وقۋ، ماماندىق الۋ، بولاشاقتى جوسپارلاۋ مۇمكىندىگىن بەرگەنى جانە ءبىزدىڭ وتباسىمىزدى قولداعانى ءۇشىن ۇلكەن العىس ايتقىم كەلەدى. ءومىردىڭ قۇندىلىقتارىن باعالاۋ وتە ماڭىزدى»، - دەيدى يننا كرەيدۋن.
س ق و اكىمى قۇمار اقساقالوۆ كرەيدۋن وتباسىنا مۇسىنشە، مەملەكەت باسشىسىنىڭ ديپلومىن، بايقاۋعا قاتىسقانى تۋرالى ەستەلىك ديپلوم مەن 5 ميلليون تەڭگەنىڭ اقشالاي سەرتيفيكاتىن تابىس ەتتى.