سەمەي پوليگونىنىڭ جابىلۋ كۇنىنە وراي 5 مىڭنان استام ادام تولەم الادى

نۇر-سۇلتان. قازاقپارات - 2021-جىلى سەمەي يادرولىق سىناق پوليگونىنىڭ جابىلۋ كۇنىنە وراي 5,2 مىڭ قازاقستاندىققا اقشالاي نەمەسە زاتتاي ءبىرجولعى الەۋمەتتىك كومەك كورسەتىلەدى، دەپ حابارلايدى قازاقپارات ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.

«بۇل كومەك ۇ و س ارداگەرلەرىنە تەڭەستىرىلگەن ازاماتتارعا دا بەرىلەدى. ولارعا يادرولىق سىناقتارعا تىكەلەي قاتىسقان اسكەري قىزمەتشىلەر، سونداي-اق يادرولىق قارۋدى سىناۋ سالدارىنان مۇگەدەك بولعان ادامدار جانە اتا-اناسىنىڭ ءبىرىنىڭ رادياتسيالىق ساۋلە الۋى سەبەبىنەن گەنەتيكالىق جاعىنان مۇگەدەك بولىپ قالعان ولاردىڭ بالالارى جاتادى»، - دەلىنگەن حابارلامادا.

مينيسترلىكتىڭ مالىمەتىنشە، الەۋمەتتىك كومەكتىڭ مولشەرى ءاربىر وڭىردە جەرگىلىكتى وكىلدى ورگانداردىڭ (ماسليحاتتاردىڭ) شەشىمى بويىنشا بيۋجەتتىڭ مۇمكىندىكتەرىنە قاراي جەكە-جەكە بەلگىلەنەتىنىن اتاپ ءوتۋ قاجەت.

جوعارىدا اتالعان ساناتتاعى ازاماتتار اي سايىن ارناۋلى مەملەكەتتىك جاردەماقى الادى:

- يادرولىق سىناقتار مەن وقۋ-جاتتىعۋلارعا تىكەلەي قاتىسقان ادامدارعا - 6,19 ايلىق ەسەپتىك كورسەتكىش (18057 تەڭگە)؛

- ەگەر اۋرۋدىڭ، مۇگەدەكتىكتىڭ يادرولىق قارۋدى سىناۋمەن سەبەپتى-سالدارلىق بايلانىسى بولسا - 7,55 ايلىق ەسەپتىك كورسەتكىش (22024 تەڭگە).

توتەنشە ەكولوگيالىق جاعدايلار سالدارىنان، ونىڭ ىشىندە يادرولىق جارىلىستار مەن سىناقتار جۇرگىزۋ كەزىندەگى رادياتسيالىق اسەردەن، ولاردىڭ سالدارىنان العان مۇگەدەكتىگى بار ادامدارعا سەبەپ-سالدارلىق بايلانىسى انىقتالعان جاعدايدا مۇگەدەكتىگى بويىنشا مەملەكەتتىك الەۋمەتتىك جاردەماقى تاعايىندالادى:

- I توپ - 2,81 ەڭ تومەنگى كۇنكورىس دەڭگەيى نەمەسە 91797 تەڭگە؛

- II توپ - 2,40 ەڭ تومەنگى كۇنكورىس دەڭگەيى نەمەسە 78403 تەڭگە؛

- III توپ - 2,01 ەڭ تومەنگى كۇنكورىس دەڭگەيى نەمەسە 65663 تەڭگە.

بۇرىنعى سەمەي وبلىسىنىڭ اۋماعىندا جانە پاۆلودار، شىعىس قازاقستان جانە قاراعاندى وبلىستارىنىڭ پوليگونعا ىرگەلەس اۋداندارىندا تۇراتىن جانە تۇرعان ازاماتتار ءۇشىن يادرولىق سىناقتاردان كەلتىرىلگەن زالال ءۇشىن ءبىرجولعى اقشالاي وتەماقى كوزدەلگەن.

وتەماقى مولشەرى تۇراتىن ايماعىنا، كەزەڭىنە جانە وتەماقى بەرىلگەن كۇنى قولدانىلاتىن ايلىق ەسەپتىك كورسەتكىشتىڭ شاماسىنا قاراي جەكە ايقىندالادى.

1996-جىلدان 2020-جىلعا دەيىن اتالعان وتەماقىنى 16,4 ميلليارد تەڭگە سوماسىندا 1,1 ميلليوننان استام ادام الدى. سونداي-اق رادياتسيالىق قاتەر اۋماقتارىندا تۇراتىن قازاقستاندىقتاردىڭ رادياتسيالىق اسەردەن زارداپ شەككەن ادام مارتەبەسى بولعان كەزدە قوسىمشا ەڭبەكاقى جانە جىل سايىنعى اقى تولەنەتىن قوسىمشا دەمالىس الۋعا قۇقىعى بار.

بۇدان باسقا، توتەنشە جانە ەڭ جوعارى رادياتسيالىق قاتەر ايماقتارىندا 1949-جىلعى 29- تامىز بەن 1963-جىلعى 5- شىلدە ارالىعىنداعى كەزەڭدە كەمىندە 5 جىل تۇرعان ادامداردىڭ جاسىنا بايلانىستى زەينەتاقى تولەمدەرىن جەڭىلدىكپەن تاعايىنداۋعا قۇقىعى بار (ەرلەر - 50 جاس، ايەلدەر - 45 جاس).