ەلوردادا جاپپاي توبەلەس بولدى - كۇدىكتىلەر 5 جىلعا سوتتالۋى مۇمكىن

نۇر-سۇلتان. قازاقپارات - استانانىڭ ورتالىق كوشەلەرىنىڭ بىرىندە جاپپاي توبەلەس بولدى.

بۇل تۋرالى قازاقپارات قالالىق پوليتسيا دەپارتمەنتىنە سىلتەمە جاساپ حابارلايدى.

15 - شىلدە كۇنى ساعات 16:36 دا ەسىل اۋدانى پوليتسيا باسقارماسىنىڭ كەزەكشى بولىمىنە قابانباي باتىر داڭعىلىنداعى كوپىردە جاپپاي توبەلەس بولىپ جاتقانى تۋرالى حابارلاما كەلىپ ءتۇستى.

وقيعا ورنىنا شىققان پاترۋلدىك پوليتسيا پولكىنىڭ قىزمەتكەرلەرى توبەلەسكە قاتىسۋشىلاردىڭ ءبارىن ۇستاپ، پوليتسيا بولىمشەسىنە اكەلگەن.

«توبەلەستى 32، 29 جانە 25 جاستاعى جىگىتتەر باستاعان. جاستار «ازيا پارك» ساۋدا-ويىن-ساۋىق ورتالىعىنىڭ كولىك تۇراعىندا جولعا سىيماي، سوزگە كەلگەن. كوپىرگە جەتكەن كەزدە ەرەگەس توبەلەسكە ۇلاسقان. توبەلەستى باستاعانداردىڭ ۇستىنەن «بۇزاقىلىق» بابى بويىنشا قىلمىستىق ءىس قوزعالدى. تەرگەۋ امالدارى ءجۇرىپ جاتىر»، - دەيدى دەپارتامەنت ماماندارى.

قوس تاراپ تا كوشەدەگى جول قوزعالىسىنا كەدەرگى كەلتىرگەنى ءۇشىن اكىمشىلىك جاۋاپقا تارتىلۋى مۇمكىن. ال قىلمىستىق ءىستىڭ قورىتىندىسى بويىنشا نەگىزگى كىنالىلەر باس بوستاندىعىنان ايىرىلۋى دا ىقتيمال.

«توبەلەسكە قاتىسۋشىلارعا 5 مىڭ ا ە ك- كە دەيىن ايىپپۇل سالىنۋى مۇمكىن نەمەسە بەس جىلعا دەيىن باس بوستاندىعىنان ايىرۋ جازاسى بەرىلۋ ىقتيمال. سونداي-اق، وزگە كولىكتەردىڭ ءجۇرىسىن شەكتەپ، جول قوزعالىسىن بۇزعانى ءۇشىن كولىك يەلەرى اكىمشىلىك قۇقىق بۇزۋ تۋرالى كودەكستىڭ 614-بابى بويىنشا اكىمشىلىك جاۋاپكەرشىلىككە تارتىلدى. نۇر-سۇلتان قالاسىنىڭ پوليتسيا دەپارتامەنتى اۆتوكولىك يەلەرىنە قوعامدىق ءتارتىپتى بۇزباۋعا شاقىرادى»، - دەلىنگەن دەپارتامەنتتىڭ مالىمەتىندە.