اقمولا وبلىسىندا 5- قاڭتارعا دەيىن قوسىمشا شەكتەۋ ەنگىزىلمەيدى
بۇل تۋرالى ءوڭىردىڭ باس مەملەكەتتىك سانيتارلىق دارىگەرىنىڭ قولدانىستاعى قاۋلىسىندا كورسەتىلگەن، دەپ حابارلايدى قازاقپارات ءتىلشىسى.
بۇل تۋرالى بريفينگىدە اقمولا وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى سەرىك ومارحانوۆ اتاپ ءوتتى.
«ۆەدومستۆوارالىق كوميسسيادا 25- جەلتوقساننان 5- قاڭتارعا دەيىن مەرەكەلىك ءىس-شارالاردى، ونىڭ ىشىندە جاڭا جىلدىق كەشتەردى وتكىزۋگە شەكتەۋ قويۋ تۋرالى شەشىم شىعارىلعان بولاتىن. بۇگىنگى تاڭدا اقمولا وبلىسىندا بۇل تىيىم ءوڭىردىڭ باس سانيتارلىق دارىگەرىنىڭ 23- قاراشاداعى 224№ قاۋلىسىمەن بەكىتىلگەن»، - دەپ اتاپ ءوتتى سەرىك ومارحانوۆ.
ونىڭ ايتۋىنشا، مەرەكە كۇندەرى مونيتورينگ توپتارى بەلسەندى جۇمىس ىستەيدى. قوعامدىق تاماقتانۋ نىساندارى تاراپىنان ەرتەڭگىلىك پەن كورپوراتيۆ وتكىزۋ كەزىندە سانيتارلىق تالاپتىڭ بۇزىلعاندىعى انىقتالعان جاعدايدا، وندا سەنبى جانە جەكسەنبى كۇندەرى ولاردى جابۋ تۋرالى ماسەلە كوتەرىلەدى.
سونىمەن قاتار، اياز اتا مەن اقشاقاردى ۇيگە شاقىرۋعا تىيىم سالىنباعانى ايتىلدى. جالپى، پاندەميا باستالعاننان بەرى اقمولا وبلىسىندا كوروناۆيرۋس ينفەكتسياسىن جۇقتىرۋ بويىنشا 6803 جاعداي تىركەلدى. ونىڭ 91 پايىزى ەرەسەكتەر، 9 پايىزى 14 جاسقا دەيىنگى بالالار. «بۇگىنگى كۇنگە دەيىن 5813 ادام ساۋىعىپ شىقتى. 94 ادام قايتىس بولدى. 380 ناۋقاس ستاتسيوناردا ەمدەلۋدە»، - دەدى س. ومارحانوۆ.
جەلتوقساننىڭ 16-23- كۇندەرى ارالىعىندا وڭىردە 404 ادامنىڭ كوروناۆيرۋس ينفەكتسياسىن جۇقتىرعانى تىركەلدى. بۇل كورسەتكىش الدىڭعى اپتامەن سالىستىرعاندا 1,2 پايىزعا از.