اقتوبە وبلىسىندا اۋىل اكىمى ورتەنىپ جاتقان ۇيدەن 5 بالانى قۇتقاردى
اقتوبە وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى ايتەكە ءبي اۋدانىنىڭ سۇلۋكول اۋىلىندا ءۇي ورتەنىپ، اۋماعى 200 شارشى مەتر باسپانا جانىپ كەتكەنىن ءمالىم ەتتى.
«ءورت سوندىرۋشىلەر وقيعا ورنىنا جەتكەنشە اۋىل اكىمى سماعۇلوۆ نۇرداۋلەت باتىلدىق تانىتىپ، 5 بالانى ۇيدەن امان الىپ شىقتى. ولاردىڭ بارلىعى تەكسەرۋ ءۇشىن مەديتسينا ماماندارىنا تاپسىرىلدى»، - دەدى ت ج د- دان.
وقيعانىڭ ءمان-جايىن قازاقپارات تىلشىسىنە سۇلۋكول اۋىلىنىڭ اكىمى نۇرداۋلەت سماعۇلوۆتىڭ ءوزى ايتىپ بەردى.
«ءورت بولعان ءۇي اكىمشىلىككە جاقىن. تاڭەرتەڭ سىرتتا جۇرگەنبىز. ۇيدەن ءتۇتىن شىعىپ جاتقانىن كورىپ، جانىمدا تۇرعان جۇمىسشىلارمەن بىرگە جەدەل جەتتىم. كىرگەن بويدا بەسىكتە جاتقان بالانى سول كۇيى الىپ شىعىپ، وزگەلەرگە ۇستاتتىم. تاعى بىرەۋى ديۆان ۇستىندە وتىردى. ونى دالاعا الىپ شىعىپ، بەتىن قارمەن ىسقىلادىق. سول كەزدە عانا بالا جىلاپ جىبەردى»، - دەدى ن. سماعۇلوۆ.
اۋىل ادامدارى العاشىندا ءورتتى ءوز كۇشىمەن سوندىرمەك بولعان. ءورت سوندىرۋشىلەر كەلگەنشە سۋ تاسيتىن كولىكپەن سۋ جەتكىزگەن. ءبىراق جالىن كۇش الىپ، ءۇي مەن وعان جاپسارلاس ورنالاسقان دۇكەن جانىپ كەتكەن.
«ءبىز بىردەن بالالاردىڭ اتا-انالارىنا حابار بەردىك. ولار اۋىلداعى وزگە دۇكەندە ءجۇردى. بالالارى ۇيدە بولعان. بۇل - ەرلىك ەمەس، پارىزىمىز. كەز كەلگەن ەر ازامات ءدال وسىلاي جاسار ەدى»، - دەدى اۋىل اكىمى.
ايتا كەتەيىك، ءورت سوندىرۋشىلەر ءۇي ىشىنەن گاز باللونىن الىپ شىقتى. ماماندار ءورت قاۋىپسىزدىگى ەرەجەسىنە سالعىرت قاراماۋدى سۇرادى.