جامبىلدا ءبىر ايدا كوروناۆيرۋسپەن اۋىرعاندار سانى 5 ەسەگە وسكەن
جيىندا ايماق باسشىسى بەردىبەك ساپاربايەۆ كارانتين شارالارىن ساقتاۋ بويىنشا حالىققا ءتۇسىندىرۋ جۇمىستارىن جۇرگىزۋدى تاپسىردى، دەپ حابارلايدى قازاقپارات ءتىلشىسى.
وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆ COVID-19-دىڭ تارالۋىنىڭ جول بەرمەۋ بويىنشا قابىلدانعان شارالار تۋرالى حابارلادى. ونىڭ ايتۋىنشا، وبلىستا ءدارى-دارمەك پەن مەديتسينالىق بۇيىمداردىڭ جەتكىلىكتى ەكەنىن، ەگەر قاجەتتىلىك بولسا 4500 توسەك-ورىنعا ورنالاستىرۋ مۇمكىندىگى بار ەكەنىن جەتكىزدى.
سالالىق باسقارما دەنساۋلىق ساقتاۋ مينيسترلىگى مەديتسينالىق جانە فارماتسيەۆتيكالىق قىزمەتتىڭ ساپاسىن باقىلاۋ كوميتەتىنىڭ دەپارتامەنتىمەن بىرلەسىپ مەديتسينالىق مەكەمەلەردىڭ كوروناۆيرۋستىق ينفەكتسيانىڭ ىقتيمال ەكىنشى تولقىنىنا دايىندىعىنا مونيتورينگ جۇرگىزۋدە، ونىڭ قورىتىندىسى بويىنشا قوسىمشا شارالار قابىلدانباق.
سانيتارلىق-ەپيدەميولوگيالىق احۋال تۋرالى بايانداي كەلە وبلىستىڭ باس دارىگەرى تاراز، شۋ، قورداي اۋداندارىندا جاعداي كۇردەلەنە تۇسۋدە ەكەنىن جەتكىزدى. سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى نەيليا مۋليكوۆا قازان ايىمەن سالىستىرعاندا قاراشادا كوروناۆيرۋسپەن سىرقاتتانۋشىلىقتىڭ 5,6 ەسەگە ارتقانىن ايتتى.
بەينەكونفەرەنتسيا رەجيمىندە قاتىسقان اۋدان اكىمدەرى كارانتين تالاپتارىن بۇزۋشىلاردى انىقتاۋ بويىنشا اتقارىلعان جۇمىستار تۋرالى قىسقاشا ەسەپ بەردى.
«مونيتورينگتىك توپتار جۇمىستى بوساڭسىتقان. كوپشىلىك جاعداي رەتتەلدى دەپ ويلايدى. تۇرعىندار ەكىنشى تولقىنعا الاڭدامايتىن سەكىلدى. ايتپەسە، ولاردىڭ ماسكاسىز جۇرگەنىن، انتيسەپتيك قولدانبايتىنىن، الەۋمەتتىك قاشىقتىقتى ساقتامايتىنىن قالاي تۇسىندىرۋگە بولادى»، - دەدى وبلىس اكىمى.
ول مونيتورينگ توپتارىنىڭ جۇمىسىن كۇشەيتۋدى تاپسىرىپ، اكىمدەر بۇل ماسەلەنى جەكە باقىلاۋىندا ۇستاۋى كەرەكتىگىن باسا ايتتى.
«ويىن-ساۋىق مەكەمەلەرى ءتۇننىڭ ءبىر ۋاعىنا دەيىن جۇمىس ىستەيدى. مەرەكە قارساڭىندا كاسىپكەرلەر مۇمكىندىگىنشە كوپ اقشا تابۋعا تىرىسادى جانە سول ارقىلى بارلىق كەلۋشىلەردىڭ دەنساۋلىعىنا قاۋىپ توندىرەدى. مەن ءوزىم كاسىپكەرلەرمەن ارنايى كەزدەستىم. ولار مەكەمەلەردىڭ جۇمىسىن قالپىنا كەلتىرۋگە رۇقسات سۇرادى جانە بارلىق سانيتارلىق نورمالاردى ساقتاۋعا ۋادە بەردى. ال قازىرگى احاۋالدى كورىپ وتىرسىزدار. ەگەر وسىلاي جالعاسا بەرسە، ءبىزدىڭ وبلىس «قىزىل» ايماققا ەنۋى مۇمكىن. بۇعان جول بەرۋگە بولمايدى. مەن تۇسىنەمىن، بيزنەسكە تابىس كەرەك، جۇمىسشىلارعا جالاقى تولەۋ كەرەك. ءبىراق ادام ومىرىنە قاۋىپ ءتونىپ تۇرعاندا، ءبىز ولاي تاۋەكەلگە بارا المايمىز. مونيتورينگتىك توپتار كارانتيندى بۇزۋ فاكتىلەرىن انىقتاپ، ءىستى سوتقا دەيىن جولداۋى كەرەك. بىرنەشە رەت بۇزعانداردى ليتسەنزياسىنان ايىرۋ كەرەك»، - دەپ تالاپ ەتتى وبلىس اكىمى.
بەردىبەك ساپاربايەۆ كوروناۆيرۋسپەن اۋىراتىندار سانى كوبەيە تۇسسە، شەكتەۋ شارالارىن ەنگىزۋ كەرەكتىگىن جەتكىزدى. ول جولاۋشىلار كولىگى جانە اۆتوموبيل جولدارى باسقارماسى باسشىلىعىنا اۆتوبۋستاردا سانيتارلىق نورمالاردىڭ ساقتالۋىن قاداعالاۋدى، تۇرعىندارمەن تۇراقتى تۇردە ءتۇسىندىرۋ جانە وبلىس ورتالىعىندا اۋقىمدى دەزينفەكتسيا جۇمىستارىن جۇرگىزۋدى، پ ت ر تەستىلەۋىمەن مۇمكىندىگىنشە كوپ ادامدى قامتۋدى تاپسىردى.