اقمولا وبلىسىندا 5 ميلليون تەڭگە پارا العان باسقارما باسشىسى جەتى جىلعا سوتتالدى

كوكشەتاۋ. قازاقپارات - اقمولا وبلىستىق مادەنيەت، ارحيۆتەر مەن قۇجاتتامالار باسقارماسىنىڭ بۇرىنعى باسشىسى ر. بيكەنوۆ پەن وبلىستىق حالىق شىعارماشىلىعى جانە مادەني دەمالىس ورتالىعى باسشىسىنىڭ ورىنباسارى ي. اكىموۆاعا قاتىستى سوت ۇكىمى شىقتى.

بۇل تۋرالى قازاقپارات ءتىلشىسى وبلىستىق سوتتىڭ باسپا ءسوز قىزمەتىنە سىلتەمە جاساپ حابارلايدى.

«كوكشەتاۋ قالالىق سوتىنىڭ ۇكىمىمەن ر. بيكەنوۆ ق ر ق ك 28 - بابىنىڭ 3 - بولىگى، 189- بابىنىڭ 3- بولىگى 2,3 - بولىمشەلەرى، 366-بابىنىڭ 3 - بولىگى 3,4 - بولىمشەلەرى بويىنشا كىنالى دەپ تانىلىپ، 7 جىلعا باس بوستاندىعىنان ايىرۋ جازاسىنا كەسىلدى. سونىمەن قاتار، ول ءومىر بويىنا مەملەكەتتىك قىزمەتتە ىستەۋ قۇقىعىنان ايىرىلدى»، - دەيدى سوتتىڭ باسپا ءسوز قىزمەتىندەگىلەر.

ۆەدومستۆودان اتاپ وتكەندەي، بۇدان بولەك، ق ر ق ك 49- بابىنىڭ 2 - بولىگى بويىنشا ر. بيكەنوۆ ق ر «قۇرمەت» وردەنى مەملەكەتتىك ناگراداسى، «ەرەڭ ەڭبەگى ءۇشىن» مەدالىنەن ايىرۋ تۋرالى ۇسىنىس جاسالدى. «ال، ق ر ق ك 189 - بابىنىڭ 3 - بولىگى 2,3- بولىمشەسى بويىنشا كىنالى دەپ تانىلعان ي. اكىموۆا 3161290 تەڭگە كولەمىندە ايىپپۇل سالىندى. جانە ونى ءومىر بويىنا مەملەكەتتىك قىزمەتتە ىستەۋ قۇقىعىنان ايىردى»، - دەپ تولىقتىردى ۆەدومستۆودان.

سوتتا بەلگىلى بولعانداي، ر. بيكەنوۆ پەن ي. اكىموۆا اقمولا وبلىستىق مادەنيەت، ارحيۆتەر مەن قۇجاتتامالار باسقارماسىنىڭ جانىنداعى وبلىستىق حالىق شىعارماشىلىعى جانە مادەني دەمالىس ورتالىعىنا 3161290 تەڭگە زالال كەلتىرگەن.

ەسكە سالا كەتەيىك، وتكەن جىلدىڭ قازان ايىندا اقمولا وبلىسىنىڭ مادەنيەت، ارحيۆتەر مەن قۇجاتتامالار باسقارماسىنىڭ بۇرىنعى باسشىسى ر. بيكەنوۆ 5 ميلليون 700 مىڭ تەڭگە پارا الدى دەگەن كۇدىكپەن ۇستالعان بولاتىن. سوت ۇكىمى كۇشىنە ەنگەن جوق.

اۆتور: اسلان وسپانوۆ