الماتىلىقتىڭ 5 جىل بۇرىن ۇرلانعان تەلەفونى ەلوردادا تابىلدى

نۇر- سۇلتان. قازاقپارات - ەلوردانىڭ پوليتسيا قىزمەتكەرلەرى قالا اۋماعىندا ۇرلىق جاساۋ كۇدىگىمەن 6 ادامدى ۇستادى، دەپ حابارلايدى قازاقپارات ءتىلشىسى.

«بازار» جەدەل الدىن الۋ شاراسىنىڭ ءۇش كۇنىندە پوليتسەيلەر قىلمىس جاساۋ كۇدىگىمەن 268 ادامدى تەكسەرىپ، ولاردىڭ ىشىندە قىلمىس جاساۋ كۇدىگىنە ىلىككەن 6 ادامدى انىقتادى، 2 قىلمىس اشىلدى. شارا بارىسىندا پوليتسيا قىزمەتكەرلەرى قالا بازارلارىن تەكسەرىپ شىقتى. ۇيالى تەلەفونداردى ساتىپ الىپ، ساتۋمەن اينالىساتىن 40 دۇڭگىرشەكتى جانە تەلەفون جوندەۋمەن اينالىساتىن 34 شەبەرحانانى تەكسەردى»، - دەلىنگەن نۇر- سۇلتان قالالىق پوليتسيا دەپارتامەنتى تاراتقان اقپاراتتا.

ۆەدومستۆو مالىمەتىنشە، «قىلمىستىق زاتتار» ساناتىندا 1800 دەن استام ۇيالى تەلەفون تەكسەرىلگەن. 9 تەلەفون تاركىلەنىپ، وندىرىسكە الىنعان قىلمىستىق ىستەرگە قاتىستى ماتەريالدارعا تىركەلگەن. سونىمەن قاتار پوليتسيا قىزمەتكەرلەرى 2015 - جىلى الماتى قالاسىندا ۇرلانعان 1 تەلەفوندى تاۋىپ، يەسىنە قايتارعان. وپەراتسيا بارىسىندا 20 ادام، ونىڭ ىشىندە 5 ادام «ۇرلانعان تەلەفونداردى ساتىپ الۋمەن جانە ساتۋمەن اينالىساتىن تۇلعالار» ساناتىنا جىكتەلگەن.

اۆتور: مارلان جيەمباي